Sjáðu slags­málin í Grinda­vík: Stuðnings­menn stukku út á gólf og lög­reglan skarst í leikinn

Njarðvík var búið að snúa leiknum við og taka forystuna þegar til kastanna kom á milli Dwayne Lautier og DeAndre Kane. Kristófer Breki Gylfason, leikmaður Grindavíkur, var snöggur að svara fyrir olnbogaskotið sem Kane fékk frá Lautier. Fleiri leikmenn blönduðu sér svo í málið.

Ekki nóg með leikmenn liðanna hjóluðu í hvorn annan heldur voru stuðningsmenn líka mættir út á gólf. Öryggisgæslan réði ekki við allan fjöldann og lögreglan stökk af stað til að skerast í leikinn.

Á endanum tókst að róa mannskapinn niður en þá þurftu dómararnir að telja saman allar villurnar og komast að einhverri skynsamlegri niðurstöðu. Sem reyndist tímafrekt.

Dominykas Milka var rekinn út úr húsi fyrir sinn þátt í slagsmálunum, nokkrir leikmenn fengu óíþróttamannslegar villur og þjálfarar beggja liða fengu tæknivillur. En sá sem lét mest fyrir sér fara í þessu slagsmálum, Jordan Semple, slapp við refsingu.

Eftir öll þessi læti stóð Njarðvík uppi sem sigurvegari í fyrsta leik einvígisins. Lesa má um leikinn í uppgjörinu hér fyrir neðan.