Þjálfari Frið­riks Leós gerði afar pín­leg mis­tök

Iowa var þremur stigum yfir og að taka innkast þegar innan við mínúta var eftir af leiknum. Liðið fór svo i sókn en þá reyndust aðeins fjórir leikmenn Nebraska vera inni á vellinum en ekki fimm.

Nebraska-menn virtust svo átta sig á þessum neyðarlegu mistökum en það var of seint og Iowa uppskar auðvelda körfu á leið sinni að sigrinum.

Það sem gerir mistökin enn neyðarlegri er að þarna var Nebraska-liðið nýbúið að taka leikhlé og hefði því átt að geta verið með allt á hreinu.

Leikmenn liðsins voru spurðir út í atvikið á blaðamannafundi eftir leik en þá greip þjálfarinn Fred Hoiberg fram í og axlaði alla ábyrgð:

„Kennið mér um að þetta gerðist. Þetta var misskilningur í samskiptum og ég er aðalþjálfarinn. Kennið mér um þetta,“ sagði Hoiberg.

Sumir hafa spurt sig af hverju dómarar leiksins leyfðu leiknum að fara af stað með aðeins fjóra leikmenn Nebraska inni á vellinum. Hoiberg sagðist ekki viss um hverjar reglurnar væru varðandi þetta en ítrekaði að ábyrgðin væri hans.

Friðrik Leó, sem er nýliði, var að vanda í leikmannahópi Nebraska í leiknum en kom ekkert við sögu. Nú hafa öll þrjú Íslendingaliðin í Marsfárinu, þar sem 64 bestu háskólalið Bandaríkjanna taka þátt, fallið úr leik og eru 8-liða úrslitin að fara að hefjast.