Íranir segja engar við­ræður við Trump-liða eiga sér stað

Seinna í dag hélt Trump því svo fram að viðræður við Írani hefðu staðið yfir um nokkuð skeið og að hann teldi mögulega stutt í samkomulag.

„Þeir vilja frið. Þeir hafa samþykkt að koma ekki upp kjarnorkuvopnum, þið vitið, og svo framvegis og svo framvegis, en við sjáum til,“ sagði Trump í dag samkvæmt AP fréttaveitunni.

Sjá einnig: Gerir hlé á á­rásum á Íran

Eins og áður segir hafa háttsettir embættismenn í Íran sagt að viðræður hafi ekki farið fram við Bandaríkjamenn. Þingforseti Íran og talsmaður utanríkisráðuneytisins eru meðal þeirra sem hafa haldið þessu fram.

Fregnir hafa hins vegar borist af því að ráðamenn í öðrum ríkjum hafi verið að miðla skilaboðum milli Bandaríkjamanna og Írana.

Wall Street Journal hefur eftir Trump að Bandaríkjamenn eigi í viðræðum við „háttsettan leiðtoga“ í Íran. Hans fólk hafi haft samband við ríkisstjórn Trumps og sagðist hann telja umræddan leiðtoga þann virtasta í Íran, af þeim sem eru enn lifandi. Hann vildi ekki segja hvern um væri að ræða, þar sem sá ætti á hættu að vera ráðinn af dögum.

„Þeir vilja gera samkomulag og við erum mikil til í það,“ sagði Trump.

„Við sjáum hvernig þetta fer. Ef þetta fer vel útkljáum við þetta. Annars munum við bara halda áfram að sprengja áfram af hjartans kröftum.“

Þetta sagði hann eftir að honum var bent á að embættismenn í Íran hefðu sagt að viðræður hefðu ekki átt sér stað.

Ætlar kannski að stjórna Hormússundi með æðstaklerknum

Trump gaf einnig til kynna í dag að ef samkomulag myndi nást, yrði Hormússund opið fyrir skipaumferð á nýjan leik og það gæti gerst mjög fljótt.

Þá hélt hann því fram að sundinu yrði stjórnað í sameiningu, kannski. Hann myndi mögulega sjálfur stjórna sundinu með æðstaklerki Íran, sama hver hann væri.

Það yrðu einnig alvarleg stjórnarskipti, enda væri búið að ráða flesta ráðamenn í Íran af dögum. Það fæli sjálfkrafa í sér stjórnarskipti. Þá vísaði hann til Venesúela og hversu vel það hefði gengið, eftir að Bandaríkjamenn numu Nicolás Maduro, fyrrverandi forseta, á brott.