Á­fengis­sala í brekkunni hafi reynst vel

Á skíðum skemmti ég mér sagði skáldið og það á svo sannarlega við hér í Hlíðarfjalli enda búið að vera brjálað að gera og enginn skortur á snjó.

Síðustu helgi var metaðsókn á skíðasvæðið. Þegar mest lét voru um 3.500 manns á skíðasvæðinu enda allir grunnskólar höfuðborgarsvæðisins með vetrarfrí á sama tíma. Forstöðumaður Hlíðarfjalls segir skíðasvæðið sjálft hafa ráðið vel við fjöldann þó aðra sögu sé að segja um bílastæðið.

„Umferðin á laugardeginum á milli ellefu og tólf var svo mikil að lögreglan ákvað að stöðva hana svo sjúkrabílar myndu komast upp ef það þyrfti. Fólk lagði bílnum bara hvar sem er. Það vildi bara komast í brekkur. Við sáum bíla keyra út í skafla og festa sig og voru ekkert að spá í því. Bara komast í brekkuna og losa sig síðar. Þetta er mjög góður vetur. Síðan um miðjan janúar er búið að vera lítið um lokanir sem er mjög óvanalegt.“

Áfengissala hefur verið leyfileg í fjallinu í nokkur ár en að sögn Brynjars hefur það reynst einkar vel.

„Ástæðan fyrir því að við leyfðum það var í rauninni að það var alltaf fólk hérna sem var að smygla eða koma með sitt eigið. Það var bara þannig hérna á sumrin að við vorum undir lyftunum að tína áfengisflöskur í tugatali. Lögreglan hefur unnið þetta í góðu samstarfi við okkur. Þeir eru að mæla og prufa þá sem eru að keyra niður fjallið. Ég veit ekki til þess að neinn hafi verið tekinn af lögreglunni á síðustu árum.“

Aukið millilandaflug til og frá Akureyrarflugvelli hefur gert bæinn að meiri ferðamannastað en áður. Fjöldi erlendra ferðamanna í brekkunni hefur margfaldast á síðustu tveimur árum.

„Það er beint flug hérna frá Hollandi og Bretlandi. Það er ótrúlega mikill fjöldi af útlendingum sem koma hingað að skíða. Eins og ég segi þá er mikið af Asíubúum sem eru að koma og þeir eru oft að skíða í fyrsta skipti. Maður sér mikið af þeim leigja sér búnað og fara í brekkurnar.“