Segir Klæbo geta hlaupið upp Esjuna á met­tíma

Í Sportpakka Sýnar í gærkvöldi fengum við atvinnuhlauparann og margfalda Íslandsmeistarann Arnar Pétursson til að taka „Klæbo sprettinn“ á hlaupabretti, sem er 250 metra sprettur á 18 kílómetra hraða í 10 prósent halla.

„Þetta er ekki auðvelt og ég get lofað þér því að ef ég væri með skíði og skíðaskó á mér, þá ætti maður ekki breik sko. Maður finnur alveg strax mjólkursýruna koma, þetta tekur alveg í sko… Að horfa á gæja fara á skíðum upp svona brekku og líta út eins og hann sé hlaupandi, það er bara galin tilhugsun.“

Færi fljúgandi upp Esjuna á undir tuttugu mínútum 

Arnar var líka sannfærður um að Johannes Klæbo gæti gert góða hluti á hlaupum.

„Það væri gaman að sjá hann hlaupa upp Esjuna til dæmis, án skíða. Hann er svo góður með stafina. Besti tíminn upp Esjuna er 21 mínúta og 40 og eitthvað sekúndur. Hann væri örugglega að fara einhvers staðar undir 20 mínútum sko, fljúgandi þarna upp.“

Ómögulegt fyrir meðalmanninn 

Til gamans fékk fréttamaður Sýnar, fulltrúi meðalmannsins, að spreyta sig á Klæbo sprettinum. Það gekk hrikalega. Markmiðið var að ná 30 sekúndum en eftir 25 sekúndna sprett í þessum mikla halla flaug undirritaður af brettinu.

Innslagið úr Sportpakka Sýnar má sjá hér fyrir neðan.