Senda flagg­skip breska flotans á norður­slóðir

Starmer sagði að flotinn myndi starfa með öðrum sveitum á svæðinu

Floti þessi er iðulega skipaður af flugmóðurskipi, tveimur fylgiskipum (freigátu og tundurspilli), einum kafbáti og olíuflutningaskipi.

Nákvæmlega hvenær til stendur að senda flotann á slóðir okkar Íslendinga liggur ekki fyrir.

HMS Prince of Wales er annað tveggja flugmóðurskipa Breta og flaggskip breska flotans. Skipið er hannað til að bera 48 F-35B Lightning II herþotur. Það eru þotur sem geta tekið á loft, næstum því lóðrétt og þurfa ekki langar flugbrautir.

Skipið getur einnig borið þyrlur og hýst 250 landgönguliða. Áhöfn skipsins er frá 700 til sextán hundruð, eftir því hver margar flugvélar eru um borð og í hvaða verkefnum áhöfnin er.

Flugmóðurskipið, sem er rúmlega 280 metrar að lengd, var fyrst tekið í notkun í desember 2019.

Auka og bæta varnir á norðurslóðum

Nú stendur yfir verkefni sem kallast Arctic Sentry. Það er hluti af viðleitni Atlantshafsbandalagsins til að auka og bæta varnir bandalagsins á norðurslóðum. Til stendur að halda fjölda heræfinga á norðurslóðum á árinu og er von á ýmsum sveitum á árinu.

Verkefni þetta var sett á laggirnir eftir að Donald Trump, forseti Bandaríkjanna, krafðist þess að NATO tæki aukna ábyrgð á vörnum norðurslóða.

Var það eftir að hann byrjaði að krefjast þess að Bandaríkin eignuðust Grænland á grunni þjóðaröryggis Bandaríkjanna og vegna meintrar ógnar frá Rússlandi og Kína.