Stjarnan tapaði úrslitaleik VÍS-bikarsins um helgina en hélt uppteknum hætti í Bónus-deildinni þegar Njarðvík kom í heimsókn í 17. umferði deildarinn í kvöld. Stjarnan skoraði vel yfir 100 stig og hélt gestunum í seilingarfjarlægð nánast allan leikinn. Lokatölur 113-103s um helgina en ætlar sér stóra hluti í Bónus-deildinni og mætir Njarðvík í kvöld.

Það var alveg vitað mál að Stjörnumenn vildu kvitta fyrir tapið í bikarnum um helgina og byrjuðu mun betur í kvöld. Komust fljótt í 5-0 og hittu virkilega vel í gegnum allan leikinn. Njarðvíkingar héldu þó í við heimamenn en misstu þá í tveggja stafa tölu fram úr sér og náðu ekki að brúa það bil. Stjarnan skoraði 35 stig í fyrsta leikhluta gegn 23 stigum gestanna sem duttu niður í gæðum og ákafa of oft á báðum endum vallarins og Stjarnan nýtti sér það.

Njarðvíkingar náðu að koma af fítonskrafti út í annan leikhlutann og minnkuðu muninn niður í tvö stig 37-35 og virkuðu eins og þeir ætluðu að koma sér yfir en gæsin var ekki gripin frekar en á öðrum köflum leiksins. Stjarnan náði að svara, halda gestunum frá sér og spyrna sér síðan frá bakkanum undir lok leikhlutans. Njarðvíkingar gleymdu sér of oft í varnarleiknum og gáfu heimamönnum, sem voru heitir, opin skot sem byggðu upp forskot að nýju. Staðan var 66-52 í hálfleik og höfðu heimamenn hitt úr 73% skota sinna.

Njarðvíkingar náðu upp betri varnarleik í seinni hálfleik en náðu þá ekki aftur á móti að skora nóg til að hala heimamenn í netin sín. Muninum var haldið í átta til tíu stigum lengst af og Stjörnumenn náðu að loka leikhlutanum í næstum sömu stöðu 88-76.

Njarðvík byrjaði betur fjórða leikhluta og setti Veigar Páll t.a.m. niður tvo þrista og allt í einu var munurinn sex stig og hlutirnir stefndu í að vera áhugaverðir. Orri Gunnarsson steig á þá glóð með þrist og Luka Gasic, sem var maður leiksins, skoraði snögg fjögur stig til að koma muninum í 11 stig aftur og þar með var björninn unninn hjá heimamönnum. Njarðvík gerði sitt ítrasta til að ná heimamönnum en skorti kraft og gæði kannski þegar menn helltust úr lestinni. Milka spilaði ekkert í seinni hálfleik og Dwayne Lautier-Ogunleye fékk fimm villur þegar um fjórar mínútur voru eftir. Þá skiptust liðin á körfum og leik lauk 113-103 fyrir Stjörnunni sem þjarmar að Grindavík á toppi deildarinnar en þetta var níundi sigurleikur þeirra í röð.

Atvik leiksins

Það er ekkert eitt stórt atvik sem hægt er að taka út úr þessum leik. Ég set hér inn hittni heimamanna. Hún var 73% í hálfleik og endaði í 58%. 

Hetjur og skúrkar

Stigahæstur og bestur á vellinum í dag var Luka Gasic. Kappinn skoraði 34 stig og hitti úr 13 af 15 skotum sínum. Njarðvíkingar réðu illa við hann og alltaf þegar Stjarnan þurfti á að halda setti hann niður þrist eða sótti tvö stig.

Hjá Njarðvík hefði vantað meira frá atvinnumönnum liðsins. Milka meiðist en aðrir hittu ekki á leikinn sinn. Ef ekki hefði verið fyrir frammistöðu Veigars Páls Alexanderssonar þá hefði þessi leikur endað mikið verr fyrir Njarðvík. Veigar skoraði 32 stig og setti niður 8 af 10 þriggja stiga skotum sínum.

Umgjörð og stemmning

Góð mæting í ÞG Verk höllina og létu áhorfendur vel í sér heyra.

Dómararnir

Þetta var ekki góð frammistaða hjá þríeykinu. Það var of mikið dæmt á köflum og ekkert á næstu. Njarðvíkingar fengu 19 víti í fyrri hálfleik en ekki nema níu í seinni. Þannig að línan var skrýtin. Svo var farið of oft í skjáinn að mínu mati. Öðrum leikjum lauk ca. 30 mínútum áður en þessum leik var lokið og tempóið ekkert hérna í kvöld.

Viðtöl:

Rúnar: Ef við skorum 103 stig gegn KR í næstu viku á heimavelli þá ætlast ég til að vinna þann leik

„Jú við héldum alveg í við þá en við hleypum þeim upp 10 mjög snemma og eftir það er jafnvægi að mínu mati“, sagði þjálfari Njarðvíkinga eftir tap gegn Stjörnunni 113-103 fyrr í kvöld. Hann var spurður að því hvort hans menn hefðu kannski ekki náð alveg að halda í við Stjörnuna í kvöld.

„Svo náum við þessu niður í sex stig í seinni og einu sinni eða tvisvar fáum við sóknir til að ná þessu nær. Þá tókum við ekki alveg nógu góðar ákvarðanir, tökum erfið skot og vantaði yfirvegun. Fengum ekki villur og fengum svo þrjú stig í andlitið. Heppnin ekki alveg með okkur. Það vantaði ekki endalaust upp á en þeir voru alltaf með svör og ferskari lappir heilt yfir.“

Mætti þá líka segja að Njarðvíkingar hafi oft gleymt sér í varnarleiknum eftir góðar sóknir þannig að það var ekki hægt að byggja upp skriðþunga?

„Já, það er rosalega dýrt. Það á ekki að koma okkur á óvart að Stjarnan vilji hlaupa upp völlinn. Ægir setur þrist, hann er kannski versti skotmaðurinn af þessum fimm sem eru yfir, Dwayne er nýbúinn að skora, dettur og er seinn til baka. Það skapar 5 á 4 stöðu og þeir voru töffarar og settu þessi skot niður og refsuðu okkur oft og tíðum fyrir svona. Aftur, þeir eru öðruvísi körfuboltalið en við og þeir náðu of oft að nota sín vopn fyrir minn smekk í kvöld.“

Eins og fram hefur komið var leikurinn langur en fannst Rúnari halla á hans menn í kvöld?

„Ég nenni ekki að tjá mig um það“, sagði þjálfarinn eftir langan umhugsunartíma.

„Ég er búinn að vera í þessum samskiptum í kvöld. Við stjórnum þessu ekki. Ég bara get ekki eytt orku í það þó ég myndi glaður vilja. Það er bara KR í næstu viku og við verðum að vinna þann leik.“

Njarðvíkingar hefðu mögulega þurft á meira framlagi að halda frá fleiri leikmönnum í kvöld. Luwayne Pipkins t.a.m. skoraði þrjú stig í fyrri hálfleik og Sven Smajlagic ekkert en báðir enduðu þeir í tveggja stafa tölu. Fannst Rúnari vanta upp á úr fleiri áttum en hann fékk í kvöld?

„Þetta snýst um að spila góðan liðskörfubolta. Ef við búum til opin skot þá er ég ánægður og ef menn stíga upp. Ég var að fá unga menn inn á völlinn í kvöld. Allir að berjast. Við erum að díla við meiðsli hjá Milka og svo erum við að reyna að hvíla. Svo skorum við 103 stig og það snýst miklu meira um að halda mönnum fyrir framan sig og loka réttum svæðum. Ef við skorum 103 stig gegn KR í næstu viku á heimavelli þá ætlast ég til að vinna þann leik.“

Domynikas Milka spilaði bara fyrri hálfleikinn í kvöld og skilaði 13 stigum á 13 mínútum. Hvernig er staðan á honum?

„Hann er bara tæpur. Eins og fyrir leikinn. Ég var mikið að reyna að finna hjálp inn í teiginn fyrir lok gluggans en það gekk ekki upp. Hann er tæpur en það var ekki það sem var að trufla hann fyrir leik sem aftraði honum frá leiknum í kvöld. Hann fékk högg á mjöðmina í kvöld og eftir góð ráð frá snillingum hér í Garðabænum var tekin ákvörðun um að hvíla hann. Hann er okkar eini stóri maður þannig að við þurftum að spila öðruvísi körfubolta og finna lausnir.“

Ingi Þór: Við skulum aðeins slaka á

„Við vorum staðráðnir í því að vinna þennan leik“, sagði Ingi Þór Steinþórsson sem stýrði Stjörnuliðinu í kvöld í fjarveru Baldurs Ragnarssonar sem lá heima með eitthvað ofur afbrigði af Covid eins og Ingi orðaði það fyrir viðtalið.

„Við ætluðum að koma okkur aftur á sigurbraut eftir dapra bikarviku. Við erum án tveggja stórra einstaklinga fyrir okkur. Baldur og Giannis Aggravanis en mér fannst liðið stíga upp og sérstaklega andlega. Ég hefði viljað sjá aðeins betri varnarleik. Að fá á sig 103 stig er aðeins of mikið en Veigar Páll var algjörlega frábær í kvöld.“

Það hlýtur samt sem áður að vera ánægjuefni að Stjarnan hálfpartin kaf sigli Njarðvíkinga sóknarlega á löngum köflum.

„Já en mér fannst við eiga inni að slíta okkur enn meira frá þeim og komast 20 stigum yfir en Njarðvíkingar náðu alltaf áhlaupum. Það voru svona fimm til sex augnablik í leiknum þar sem við töpuðum bolta eða misstum frákast sem héldu þeim þetta nálægt okkur. 10 stig eru fljót að fara ef þú missir einbeitinguna en við héldum henni og ég verð að hrósa mannskapnum fyrir það. Ég er mjög ánægður með þennan sigur.“

Þetta eru orðnir níu sigurleikir í röð fyrir Stjörnuna og þeir skora yfir 100 stig að meðaltali í leik. Gætu Stjörnumenn rúllað upp restinni af deildarkeppninni?

„Við skulum aðeins slaka á. Við getum það alveg. Við eigum Ármann næst og það er krefjandi verkefni. Við þurfum bara að safna krafti og svo kemur landsleikjahlé. Við þurfum að bæta okkur og vera klárir þegar stóri dansinn byrjar.“

Hvað er hægt að taka út úr þessum leik?

„Orkan og að vinna. Það er alltaf stórt að vinna og lífið er bara auðveldara á öllum stöðum þegar maður vinnur heldur en að tapa. Við þurfum að taka það út úr þessum og það án tveggja stórra karaktera. Við hrósum öllu teyminu og liðinu fyrir það.“