„Þá er þetta munurinn á liðunum“

„Við vorum bara ömurlegar í fyrri hálfleik. Bara soft og lélegar, en vorum góðar í seinni. Virkilega sterkar í seinni, mættum þeim, vorum ákveðnar, börðumst og þegar bæði liðin gera það þá er þetta munurinn á liðunum,“ sagði Þorleifur í samtali við Vísi eftir leik.

Grindavíkurliðið náði í nokkur skipti í kringum tíu stiga forskoti í fyrri hálfleik, en hleypti Stólunum aftur inn í leikinn. Hvað fannst Þorleifi breytast í hléi?

„Við hættum að væla og hættum að horfa á hvora aðra. Við tókum ábyrgð á því sem við eigum að gera og gerðum það. Því fór sem fór.“

Þorleifur fékk gott framlag frá sínum helstu leikmönnum í kvöld, en fremst meðal jafningja var líklega Abby Beeman, sem tók yfir leikinn í seinni hálfleik og endaði með 29 stig.

„Abby gerir þetta alltaf. Við eigum ekkert að vinna og tapa á því og mér fannst það vera liðsheildin sem kláraði þetta. Þær voru tilbúnar þegar var verið að tvöfalda á Abby og búa til sendingarlínur fyrir hana. Hún er frábær leikmaður og við erum með fleiri frábæra leikmenn varnar- og sóknarlega.“

„Hún gerði bara sitt. Þetta er vinnan hennar og hún er góður leikmaður. Ég bara geri ráð fyrir þessu í hverjum einasta leik.“

Grindvíkingar mæta Keflavík í úrslitum VÍS-bikarsins í Suðurnesjaslag. Fyrir hinn hlutlausa körfuboltaáhugamann er það draumaúrslitaleikur, en Þorleifur er hins vegar ekki jafn hrifinn af því.

„Þetta er eina liðið sem við höfum bara verið í þvílíku basli með. Þær keyrðu algjörlega yfir okkur þannig ég þarf virkilega að fara að leggja höfuðið í bleyti og finna út úr því hvernig í ósköpunum við getum unnið þær. En ég býst við hörkuleik og við mætum klárar til að vinna.“

Þrátt fyrir að Þorleifur ætti enn eftir að leggja höfuðið í bleyti hafði hann þó ýmsar hugmyndir um það hvernig væri hægt að vinna þetta Keflavíkurlið.

„Við þurfum að hlaupa vel til baka og stoppa hraðaupphlaupin þeirra. Við þurfum að vera sterkar á svellinu. Ekki vera vælandi í hvorri annarri eða í dómurunum. Það er mikið mótlæti í svona leikjum og maður þarf bara að standast það og vera sterkur andlega. Við fyrstu sýn er þetta það sem ég veit að við þurfum að gera,“ sagði Þorleifur að lokum.