Sam­bandið aldrei verra: Ís­land gæti bæst á listann

Donald Trump tilkynnti á samfélagsmiðli sínum Truth social í gær að tíu prósenta tollur verði lagður á allar innfluttar vörur frá Danmörku, Noregi, Svíþjóð, Frakklandi, Bretlandi, Hollandi og Finnlandi frá og með fyrsta febrúar. Þann fyrsta júní verður tollurinn hækkaður í 25 prósent.

Tollarnir beinist gegn löndum sem hafa sett sig upp á móti því að Bandaríkin eignist Grænland með því að senda mannafla til Grænlands síðustu daga.

Enn hefur ekkert komið fram sem gefur til kynna að Grænlandstollarnir bitni á Íslandi þrátt fyrir að hafa sent tvo fulltrúa Landhelgisgæslunnar.

Bandaríkjaforseti mögulega gleymt Íslandi

Vilborg Ása Guðjónsdóttir, alþjóðastjórnmálafræðingur segir það vel geta verið að Bandaríkjaforseti hafi gleymt Íslandi.

„Það hefur væntanlega einhver áhrif að við erum ekki með her og þetta eru ekki hermenn sem við erum að senda. Síðan hefur kannski borið lítið á því í alþjóðlegum fjölmiðlum og hann kannski veit ekki af því að við höfum sent einhverja fulltrúa. 

Heldurðu að það geti jafnvel gerst að okkur verði bætt á þennan lista?

„Í það minnsta höfum við lítið um það að segja en það er ekki útilokað að okkur verði bætt á listann eftir því sem þessu vindur fram. Eins og staðan er í dag erum við ekki á honum en auðvitað ef að aðstæður þróast áfram næstu daga og vikur þá gæti það að sjálfsögðu breyst.“

Ekkert jákvætt og Bandaríkin einnig háð Evrópu

Fjölmargir Evrópuleiðtogar hafa stigið fram og fordæmt útspil Trumps. Þá hefur verið vísað til áformanna sem fjárkúgunar.

„Þetta eru auðvitað miklar þvingunaraðgerðir sem hann er að beita bandalagsríki. Staðan er gríðarlega alvarleg. Það er erfitt að sjá að þróunin fram á við geti verið jákvæð á einhvern máta.“

Verslunarsamningur Bandaríkjanna og Evrópusambandsins sem var undirritaður í fyrra er nú í uppnámi en meirihluti Evrópuþings neitar nú að staðfesta samkomulagið. Sendiherrar Evrópusambandsins koma saman á neyðarfundi seinna í dag.

Vilborg segir Evrópu langt því frá að standa varnarlausa frammi fyrir ákvörðunum Bandaríkjanna.

„Heldur eru Bandaríkin einnig háð Evrópu. Evrópusambandið er auðvitað stærsti innri markaður í heimi og viðskiptasamband Bandaríkjanna við Evrópu er því mjög mikilvægt. Það eru ákveðin tól sem Evrópusambandið getur beitt sem bíta hart hvað varðar bandarískan efnahag,“ segir Vilborg sem nefnir sem dæmi tolla og að gera bandarískum fyrirtækjum erfiðara fyrir á evrópskum mörkuðum.

Ísland á milli í skothríðinni

Hefur samband Bandaríkjanna og Evrópu einhvern tímann verið verra?

„Nei, það hefur aldrei verið verra en það er núna. Ég held að það sé alveg hægt að halda því fram.“

Ísland gæti orðið á milli í tollastríðinu.

„Staðan er gríðarlega alvarleg og það stefnir í algjört uppnám í samskiptum Evrópu og Bandaríkjanna og jafnvel allsherjar viðskiptastríð sem myndi auðvitað hafa gífurlega miklar afleiðingar.  Allt uppnám í alþjóðakerfinu, ég tala nú ekki um á milli Evrópusambandsins og Bandaríkjanna, hefur auðvitað bein áhrif á ísland það segir sig sjálft. Við erum gríðarlega háð alþjóðlegum viðskiptum.“