Besti CrossFit-maður Ís­lands elskar Búlluna

„Stimplaðu þig út með Björgvini Karli Guðmundssyni þar sem við könnum rætur hans í Reykjavík og augnablikin sem mótuðu goðsagnakenndan feril hans. Komdu með okkur í göngutúr um íslenska náttúru, kíktu við á uppáhaldsveitingastaðinn hans og heimsæktu heimabæinn sem ól af sér einn stöðugasta íþróttamanninn í greininni,“ segir í kynningu á þættinum um okkar mann.

Björgvin Karl sagði frá því hvar þetta allt byrjaði, hverjir voru í bransanum á fyrstu keppnisárum hans og hvernig tilfinning það er að fylgjast með nýrri kynslóð íþróttafólks komast í fremstu röð.

Hann viðurkenndi að hann væri orðinn einn af gömlu körlunum í sportinu en sú tilfinning sé samt nýtilkomin.

Björgvin Karl tók á móti gestum sínum í Hveragerði og fór með þá í göngutúr um nágrennið.

„Ég myndi segja að náttúran spili stórt hlutverk í því hvar ég vil vera, hvar ég vil búa og allt það,“ sagði Björgvin Karl.

Sagði sögur af Lazar Dukic

Björgvin Karl segir líka sögur af Lazar Dukic, sem var mikill félagi hans, en Lazar drukknaði í fyrstu grein heimsleikanna árið 2024.

„Hann vissi nákvæmlega hverjir hæfileikar hans voru. Já. Já. Það sem hann hafði í raun var að hann gat ýtt sér lengra en fólk gerði sér grein fyrir,“ sagði Björgvin sem viðurkenndi að hann saknaði hans mikið.

Veit ekki hvernig CrossFit-senan hefði orðið

Björgvin sagði líka frá því hversu mikinn hlut Anníe Mist Þórisdóttir á í því hversu vinsæl CrossFit-íþróttin varð á Íslandi.

„Það var svo mikið af fólki sem var að stunda CrossFit og þau vildu gera það til að keppa. Ég meina, ef Annie hefði aldrei unnið leikana, veit ég ekki hvernig CrossFit-senan hefði orðið,“ sagði Björgvin.

Fyrsti samningurinn á ferlinum

Hann fór síðan með þá á uppháldsveitingastaðinn sinn í heiminum sem er Hamborgarabúllan.

„Við ætlum að fara á Hamborgarabúllu Tomma. Þetta er uppáhaldsveitingastaðurinn minn í heiminum. Árið 2012 eða 2013 fékk ég fimmtíu prósenta afslátt ævilangt á Búllunni. Þetta var fyrsti samningurinn á ferlinum mínum,“ sagði Björgvin. Síðan hafa þeir bæst við nokkrir.

Það má horfa á allan þáttinn hér fyrir neðan.