Salah ekki með Liverpool til Ítalíu

Þetta er orðið ljóst nú þegar Liverpool hefur opinberað þá nítján leikmenn sem ferðast yfir til Mílanó í dag og munu mæta Inter Milan á morgun. Þar er nafn Mohamed Salah ekki að finna. 

Salah, sem er einn af bestu leik­mönnum ensku úr­vals­deildarinnar lét gamminn geisa eftir að hafa verið ónotaður varamaður í leik gegn Leeds United um helgina sem lauk með 3-3 jafn­tefli. Salah, sem hefur verið prímu­smótor í liði Liver­pool undan­farin ár, hefur byrjað síðustu þrjá leiki Liver­pool á bekknum.

Á viðtals­svæði Elland Road, heima­vallar Leeds, eftir leikinn um helgina gaf Salah sér góðan tíma með blaðamönnum sem er nokkuð ólíkt honum. Fljótt kom í ljós að um ekkert eðli­legt við­tal var að ræða.

Salah sagði að verið væri að henda sér undir rútuna og að ein­hver hjá félaginu vildi ekki hafa hann þar. Þá lýsti hann því hvernig sam­band sitt og Arne Slot væri brostið.

Salah æfði í gær með þeim leikmönnum Liverpool sem tóku lítinn sem engan þátt í leiknum gegn Leeds United og þá mætti hann aftur á æfingu með aðalliðinu í hádeginu í dag. 

Fyrr í dag var sagt frá því að líklegt þætti að Salah myndi ekki vera í leikmannahópi Liverpool á morgun. Richard Hughes, yfirmaður knattspyrnumála hjá Liverpool, í samráði við þjálfarann Arne Slot sem og eigendur Liverpool ákvað að Salah yrði ekki með gegn Inter Milan í Meistaradeildinni. 

Er sú ákvörðun talin til marks um þann stuðning sem þjálfarinn Slot hefur hjá stjórnendum félagsins samkvæmt því sem kemur frá hjá The Athletic.

Framhaldið er óljóst. Liverpool á leik á heimavelli gegn Brighton um komandi helgi en eftir þann leik er Salah á leið á Afríkumótið með Egyptalandi. 

Vitað er af áhuga á hans kröftum hjá félögum frá Sádí-Arabíu og Bandaríkjunum. Nú þarf að koma í ljós hvort hann og Slot geti slíðrað sverðin eða hvort annar þeirra þurfi að fara frá Liverpool. 

Leikur Inter Milan og Liverpool annað kvöld er sýndur í beinni útsendingu á Sýn Sport Viaplay klukkan átta.