Upp­gjörið: Grindavík-Keflavík 95-103 | Keflavíkurkonur sýndu styrk sinn í Grinda­vík

Keflavík vann sinn þriðja leik í röð í Bónus-deild kvenna í körfubolta í kvöld þegar þær sóttu sigur til Grindavíkur.

Keflavík vann leikinn með átta stiga mun, 103-95, en sigurinn var sannfærandi og Grindavíkurkonur lögðuðu aðeins stöðuna í lokaleikhlutanum.

Keflavík komst upp fyrir Grindavík með þessum sigri en bæði lið eru með tólf stig í þriðja til fimmta sæti ásamt KR en Njarðvík og Valur eru tveimur stigum á undan.

Leikurinn fór vel af stað og setti Keflavík þrist í sinni fyrstu sókn. Grindavík mættu örlítið vanstilltar til leiks en fyrstu tvær mínúturnar voru þær að gera klaufaleg mistök sem Keflavík náði þó ekki að nýta sér.

Grindavík tók fyrsta áhlaup leiksins og sótti fjögurra stiga forskot. Keflavík svaraði því með því að keyra upp hraðan og sóttu mest tíu stiga forskot. Grindavík vann sig vel inn í leikinn aftur og var jafnræði með liðunum að lokum fyrsta leikhluta 22-23.

Í öðrum leikhluta var það Keflavík sem náði að stíga skrefinu framar. Bæði lið náðu góðum áhlaupum og voru hættuleg þegar þau komust á ferðina.

Grindavík náði forystu í skamman tíma um miðbik leikhlutans en sú forysta lifði ekki lengi og Keflavík náði sér í gott forskot aftur sem þær héldu fram að hálfleik. Keflavík leiddi með fimm stigum þegar liðin gengu til búningsklefa í hálfleik 45-50.

Keflavík mætti með krafti út í seinni hálfleikinn. Þær voru að tengja saman sókn og vörn virkilega vel og náðu upp þrettán stiga forskoti um miðbik leikhlutans áður en Grindavík tók leikhlé til að ráða ráðum sínum.

Gestirnir frá Keflavík náðu mest átján stiga forskoti en þegar þriðji leikhluti var úti var staðan 64-78 Keflavík í vil.

Sara Rún Hinriksdóttir opnaði fjórða leikhluta með þrist fyrir Keflavík en nýting Keflavíkur fyrir aftan þriggja stiga línuna í kvöld var virkilega góð.

Grindavík náði frábæru áhlaupi í fjórða og settu stór skot sem náði að minnka mun Keflavíkur niður í fimm sig þegar um fimm mínútur voru eftir af leiknum.

Keflavík gerði þó vel að stoppa áhlaup Grindavíkur og náðu að lokum að fara með öflugan átta stiga sigur 95-103.

Atvik leiksins

Frábær þriggja stiga nýting Keflavíkur reyndist Grindavík ansi þungbær í kvöld. Þristar frá Söru Rún og Önnu Ingunni drápu von Grindavíkur á endurkomu í fjórða leikhluta.

Stjörnur og skúrkar

Farhiya Abdi var stigahæst í liði Grindvíkur með 27 stig og reyndist oft liði gestana erfið undir körfunni.

Dómararnir

Sigmundur Már Herbertsson, Bjarni Hlíðkvist Kristmarsson og Dominik Zielinski voru á flautunni hér í kvöld.

Ég var heilt yfir bara ánægður með frammistöðu dómarana hér í kvöld. Auðvitað hægt að pikka út einhver einstaka atriði en heilt yfir var þetta bara fínt.

Stemingin og umgjörð

Viðtöl

„Um það snýst þessi deildarkeppni að safna stigum“

„Sáttur við stigin tvö, það er svona það helsta sem við tökum út úr þessu“ sagði Hörður Axel Vilhjálmsson þjálfari Keflavíkur eftir sigurinn í kvöld. 

Keflavík náði mest 18 stiga forskoti í leiknum en Hörður Axel var ekki ósáttur þrátt fyrir að missa niður gott forskot.

„Nei ég ber virðingu fyrir sigrinum og ánægður með að hafa sigrað leikinn“ 

„Auðvitað vill maður þegar við erum komir 18 stigum yfir kaffæra leiknum en á sama tíma gerðu þær vel og hittu úr skotum til þess að koma sér aftur inn í leikinn og minnka muninn“

„Heilt yfir er ég ánægður með stigin tvö því um það snýst þessi deildarkeppni að safna stigum“ sagði Hörður Axel Vilhjálmsson.

„Vantaði kannski pínu traust bara á hvor aðra“

„Svekkjandi hvað þær náðu að hlaupa á okkur mikið“ sagði Þorleifur Ólafsson eftir tapið í kvöld. 

„Við vorum að reyna tala um að hægja á þeim en það tókst bara klárlega ekki“

Það er auðveldast að benda á þriðja leikhlutan þar sem þetta fer frá Grindavíkurliðinu en Keflavík náði að búa til myndarlegt forskot í þriðja leikhluta. 

„Sammála því. Þá ná þær að keyra upp hraðan einhvern veginn og svo vorum við ekki alveg að fara eftir því sem að við töluðum um á móti 'pick and roll-i'“

„Það kannski svolítið gaf bakverðinum þeirra svolítið mikið pláss og hún var að komast svolítið auðveldlega inn í teig og þá var erfitt að taka þær“

„Okkur vantaði kannski pínu traust bara á hvor aðra til þess að gera það betur“ sagði Þorleifur Ólafsson þjálfari Grindavíkur.