„Að­eins öðru­vísi en alltaf geggjað að hafa Katrínu með mér“

„Já þetta var bara ótrúlegt, að vera þarna fyrir framan fulla höll, að spila fyrir íslenska landsliðið á HM, þetta var sturlað“ sagði Matthildur og brosti út að eyrum en hún spilaði fyrsta landsleikinn í haust og var kölluð inn í HM hópinn með skömmum fyrirvara.

Vegna meiðsla Andreu Jacobsen og Elísu Elíasdóttur stóðu Matthildur Lilja og liðsfélagi hennar í ÍR, Katrín Tinna Jensdóttir, vaktina í vörninni heilmikið gegn Þýskalandi.

„Þetta var stórt hlutverk að taka, en mér fannst það bara gaman, að fá að berjast og taka ábyrgð. Gaman að prófa að miða sig við þá bestu, það er þangað sem maður stefnir.“

Þær tvær hafa líka verið lykilleikmenn í liði ÍR, sem hefur komið skemmtilega á óvart í Olís deildinni í vetur og vann Íslandsmeistara Vals í síðasta leiknum fyrir HM hlé. 

Höllin í Stuttgart er þó aðeins stærri og meiri en íþróttahúsið í Skógarselinu.

„Já það var aðeins öðruvísi, en alltaf geggjað hafa hana Katrínu með mér.“

Aftur mun mikið mæða á Matthildi í kvöld, þegar Ísland mætir Serbíu í öðrum leik C-riðils.

„Þetta verður geðveikt, við erum ótrúlega spenntar að mæta þeim.“

Leikur Íslands og Serbíu hefst klukkan 19:30 í kvöld og verður í beinni textalýsingu á Vísi. Íþróttadeild Sýnar er í Stuttgart og fylgir stelpunum okkar eftir á meðan mótinu stendur.