Fyrsta mann­fall Rússa í um­sátri í Malí

Vígamenn hóps sem kallast Jama‘at Nusrat al-Islam wal-Muslimin eða JNIM, sátu fyrir bílalest Africa Corps og malíska hersins þann 1. ágúst. Síðan þá hafa myndbönd af umsátrinu verið birt á netinu og sýna þau að minnsta kosti þrjú lík hvítra manna, samkvæmt frétt France24.

Nokkrum sinnum í þessum myndböndum má heyra vígamenn JNIM tala um „Wagner-liða“. Málaliðar á vegum rússneska auðjöfursins Jevgení Prígósjín eru þó farnir eða vinna fyrir Africa Corps.

Málaliðar Wagner fóru fyrst til Malí í lok árs 2021, eftir að frönskum hermönnum var gert að yfirgefa landið í kjölfar tveggja mismunand valdarána hermanna. Prígósjín dó svo eins og frægt er árið 2023, þegar sprenging varð um borð í flugvél hans skammt frá Moskvu. Þangað hafði auðjöfurinn ferðast til að reyna að halda stjórn á veldi sínu og málaliðahópnum eftir misheppnaða uppreisn hans gegn Pútín sumarið 2023.

Africa Corps hefur tekið yfir viðskipti Wagner víðsvegar um Afríku. Það gerðist svo í Malí fyrr í sumar.

Sjá einnig: Wagner yfirgefur Malí í skugga mikilla árása

Eftir umsátrið sendu leiðtogar JNIM út yfirlýsingu um að þeir hefðu lagt hald á eitt farartæki, sextán Kalashnikov riffla, vélbyssur, skotfæri og önnur hergögn.

Rússneskir herbloggarar hafa einnig gagnrýnt Africa Corps eftir umsátrið. Einn þeirra vinsælustu sakaði forsvarsmenn varnarmálaráðuneytis Rússlands um að vanmeta hættuna í Afríku.

Aukin umsvif og fleiri árásir

Umsvif JNIM í Malí hafa aukist töluvert að undanförnu og árásum fjölgað til muna. Sérfræðingar hugveitunnar ACLED segja fjölgun árása og umfang þeirra sýna fram á að geta hryðjuverkasamtakanna hafi aukist til muna og eru vígamenn sagðir hafa sett upp vegatálma kringum tvær borgir í landinu.

Árásirnar og ofbeldið, auk mannrána á erlendum verkamönnum, hefur leitt til þess að Kínverjar eru hættir námuvinnslu í Malí.

Hryðjuverkamenn sem tengjast Íslamska ríkinu (IS-S) eru einnig virkir í Malí, eins og JNIM, en báðir hópar eru virkir víða um Sahelsvæðið. Í Malí berjast einnig Túaregar sem barist hafa um árabil fyrir eigin ríki í eyðimörkinni í norðurhluta landsins. Þessi hópur kallast FLA.

Sjá einnig: Túaregar björguðu spænskum manni úr klóm Íslamska ríkisins

Vígahópar hafa lengi haldið til á Sahelsvæðinu svokallaða en þar er átt við þurrt svæði suður af Sahara-eyðimörkinni sem nær yfir þvera Afríku. Þar hafa þeir um árabil hagnast á óskráðum gullnámum, auk þess sem hóparnir skattleggja íbúa á yfirráðasvæðum sínum og fjármagna sig með ránum.

Hóparnir fjármagna sig einnig með smygli á fíkniefnum og fólki, svo eitthvað sé nefnt.

Vilja taka við af Wagner og fá peninga

Africa Corps hefur nú tekið yfir samninga Wagner Group í öllum ríkjum Afríku þar sem Rússar eru með viðveru, að Mið-Afríkulýðveldinu undanskildu.

Fregnir bárust af því á dögunum að ráðamenn í Moskvu hafi krafist þess að ráðamönnum í Bangui, höfuðborgi Mið-Afríkulýðveldisins, að ríkið hætti viðskiptum við Wagner og að málaliðar Africa Corps tæku við af málaliðum Wagner. Þá eru Rússar sagðir hafa farið fram á að fá greiddar fúlgur fjár fyrir þjónustuna.

Þetta eru ráðamenn í Bangui víst ekki til í en þeir eru sagðir telja málaliða Wagner betri en menn Africa Corps, þar sem þeir berjast með hermönnum gegn uppreisnarmönnum. Africa Corps leggur meiri áherslu á þjálfun heimamanna.

Þar að auki hafa málaliðar Wagner fengið greitt með aðgengi að námum og öðrum auðlindum ríkisins.

Ríkisstjórn Mið-Afríkulýðveldisins óttast að geta ekki grætt þær upphæðir sem Rússar vilja og vonast þess í stað að fá að greiða Rússum í gulli, úrani og járni.