KR sækir ungan bak­vörð

Hinn tvítugi Reynir leikur sem bakvörður og hefur undanfarin tvö tímabil spilað með Þór Akureyri í 1. deildinni. Hann er hins vegar uppalinn á Sauðárkróki.

Á síðasta tímabili skilaði Reynir 19 stigum að meðaltali í leik ásamt því að taka að meðaltali sjö fráköst og gefa fjórar stoðsendingar. Þá á hann að baki leiki fyrir yngri landslið Íslands, þar á meðal með U-20 ára landsliðinu þegar það lék í A-deild Eurobasket á síðasta ári.

„Reynir er góður íþróttamaður og átti mjög gott tímabil í fyrra með Þór Akureyri. Hann mun koma með góða orku og auka samkeppnina enn frekar í hópnum. Ég er mjög ánægður með þessa viðbót í okkar góða hóp,“ sagði Jakob Örn Sigurðsson, þjálfari KR, um nýjustu viðbót liðsins.