Rene Kirby er látinn

Greint er frá andláti Kirby á Seven Days, staðarmiðli í Vermont-ríki, þar sem segir að Kirby hafa fallið frá 11. júlí eftir að hann var lagður inn á spítala í Vermont. Að sögn Jon Kirby, bróður Rene, hafði hann verið á spítala í tvo mánuði vegna sýkingar og veikindum í vélinda, nýrum og þvagblöðru.

Rene fæddist með hryggrauf (e. spina bifida) sem gerði að verkum að hann var með skerta hreyfigetu á fótum og þurfti að nota hendurnar til að ganga.

Stuttur leiklistarferill, fimleikar og störf hjá IBM

Kirby átti stuttan en eftirminnilegan feril, hann lék í einum þætti af fantasíuseríunni Carnivàle (2003-05) og í tveimur myndum eftir Farrelly-bræður. 

Annars vegar lék Kirby í svörtu kómedíunni Shallow Hal (2001) með Jack Black og Gwyneth Paltrow. Hins vegar lék hann í gríndramanu Stuck on You (2003) sem fjallar um síamstvíbura leikna af Matt Damon og Greg Kinnear.

Rene ræddi um líf sitt með hryggjarskekkju í Youtube-þættinum Stuck in Vermont þar sem hann sagðist aldrei hafa vorkennt sjálfum sér því lífið væri of stutt til þess.

„Að ganga á höndunum er það eina sem ég hef þekkt,“ sagði hann þar. „Ég hef aldrei hugsað um sjálfan mig sem fatlaðan.“

Utan leiklistarinnar keppti Kirby í fimleikum í menntaskóla, starfaði í tuttugu ár hjá IBM og hjálpaði bróður sínum að gera upp mörg hús. Kirby greindist með hálskrabbamein fyrir nokkrum árum og þurfti að fjarlægja úr honum barkakýlið þannig hann gat ekki lengur talað.