Endurnýja kynnin: „Stórar skoðanir en ekki endilega góðar skoðanir“

Valur Páll Eiríksson skrifar 17. júlí 2025 08:02

Þorsteinn og Logi eru spenntir fyrir því að lýsa saman golfi á ný. Vísir/Samsett

Opna breska meistaramótið í golfi fer fram um helgina og hófst raunar snemma í morgun. Rory McIlroy mun þar leika á heimavelli en hann bognaði undan pressu síðast þegar mótið fór fram á Norður-Írlandi. Gamlir félagar endurnýja kynnin í lýsingu mótsins á Sýn Sport.

„Tilfinningin er alltaf góð fyrir Opna mótinu. Þetta fer snemma af stað, við byrjum útsendingu klukkan 5:30 í fyrramálið og verðum til 19:00 annað kvöld. Þetta eru langir dagar en gríðarlega skemmtilegir dagar. Það er fátt betra en að vakna við gott golf að morgni og liggja svo yfir sjónvarpinu allan daginn,“ segir Þorsteinn Hallgrímsson um mótið en hann mun lýsa því á Sýn Sport 4 frá fimmtudegi til sunnudags.

McIlroy og Scheffler þykja líklegir til árangurs en þeir hafa unnið eitt stórmótið hvor í ár.Michael Reaves/Getty Images

McIlroy fór á taugum

Opna mótið fer fram í 153. sinn um helgina en aðeins í þriðja sinn á Portrush-vellinum á Norður-Írlandi. Mótið fór þar síðast fram árið 2019 þar sem Írinn Kyle Lowrey fagnaði sigri.

„Mér líst virkilega vel á þetta mót. Scottie Scheffler er talinn sigurstranglegastur, en flestir halda með Rory McIlroy, því hann er á heimavelli,“ segir Þorsteinn. Á meðan vel gekk hjá Lowrey 2019 fór heimamaðurinn Rory McIlroy heim með skömm á öðrum degi.

„Síðast þegar var leikið á Royal Portrush byrjaði McIlroy ekki vel og komst ekki í gegnum niðurskurðinn. Þannig að væntingar hjá honum og mörgum áhugamönnum eru að hann verði í baráttunni,“

Stressið fór með McIlroy síðast þegar Opna breska fór fram á Portrush-vellinum.Ross Kinnaird/Getty Images

„Það var áhugavert að heyra viðtal við hann í vikunni þegar hann var spurður hvað gerðist. Hann sagðist ekki hafa áttað sig á því hvað hann var stressaður þegar hann var að spila á heimavelli á Opna mótinu. En nú er hann reynslunni ríkari,“ segir Þorsteinn

Logi skemmtilegur en skoðanirnar vafasamar

Aðstæður eiga til að vera meira krefjandi en gengur gerist á risamótum vestanhafs og verður áhugavert að sjá hvernig kylfingar takast á við strandvöllinn við Portrush. Þá gæti rigning haft áhrif.

„Það sem er sjarminn við Opna mótið er að kylfingarnir þurfa að geta slegið öll högg. Scottie Scheffler hafði orð á því í vikunni að þú verður að geta slegið nánast öll högg til að til að bera sigur úr býtum. Svo eru það aðstæðurnar. Það spáir einhverri úrkomu allavega fimmtudag, föstudag og laugardag þannig að veðrið getur sett strik í reikninginn.“

Þorsteinn mun lýsa mótinu á Sýn Sport næstu daga. Ásamt bæði Loga Bergmann Eiðssyni og Jón Júlíusi Karlssyni sem halda úti golfhlaðvarpinu Seinni níu.

Þeir Þorsteinn og Logi endurnýja kynnin í lýsendabúrinu eftir töluvert hlé, þar sem þónokkuð er síðan þeir lýstu saman.

„Það er orðið ansi langt síðan. Það verður gaman að vera með Loga. Hann hefur stórar skoðanir á golfi en ekkert alltaf endilega góðar skoðanir,“ segir Þorsteinn léttur.

„Þetta verður mikil skemmtun og ég lofa því að það verður enginn svikinn af því að horfa á Opna mótið núna næstu fjóra daga.“

Viðtalið má sjá í spilaranum.

Bein útsending frá Opna mótinu hófst klukkan 5:30 á morgun og stendur yfir á Sýn Sport 4 og verður fram á kvöld.

Opna breska Golf