Gattuso að taka við ítalska lands­liðinu

„Við erum búnir að vera að vinna í þessu og erum að ganga frá smáatriðunum… Forsetinn hefur verið upptekinn undanfarna daga, en við erum sannfærðir um að rétt ákvörðun hafi verið tekin“ sagði Gianluigi Buffon, yfirmaður hjá ítalska knattspyrnusambandinu.

Gattuso er fyrrum landsliðsmaður Ítalíu og var hluti af heimsmeistaraliðinu árið 2006. Alls á hann að baki 73 landsleiki fyrir þjóð sína.

Hann hóf þjálfaraferilinn árið 2013 þegar hann var enn leikmaður, sem spilandi þjálfari Sion í Sviss eftir þrettán ár þar áður sem leikmaður AC Milan. Á þjálfaraferlinum hefur hann stýrt tólf liðum og unnið einn titil, ítalska bikarinn árið 2020 með Napoli.

Síðast var hann þjálfari króatíska liðsins Hajduk Split, en lét af störfum eftir tímabilið.

Gattuso á ærið verk fyrir höndum í undankeppni HM. Ítalía hefur misst af síðustu tveimur heimsmeistaramótum og byrjaði undankeppnina á slæmu 3-0 tapi í Noregi, en bætti aðeins upp fyrir það með sigri gegn Moldóvu á heimavelli.