Heimar mega kaupa Grósku

Fyrirvaranum um samþykki Samkeppniseftirlitsins hefur því verið aflétt. Unnið er að frágangi viðskiptanna og má gera ráð fyrir því að afhending 258 milljón nýrra hluta í Heimum fari fram á næstu vikum.

Tæplega fjórtán milljarða viðskipti

Heimar tilkynntu í febrúar að gengið hefði verið frá samkomulagi um helstu skilmála um kaup Heima á öllu hlutafé Grósku ehf. og Gróðurhússins ehf.. Gróska ehf. á fasteignina Grósku að Bjargargötu 1, 102 Reykjavík. Heildarvirði viðskiptanna væri metið á 13,85 milljarða króna. 

Birgir Már Ragnarsson, Björgólfur Thor Björgólfsson og Andri Sveinsson yrðu stærstu eigendur Heima eftir viðskiptin, en þeir eru uppbyggingaraðilar og eigendur Grósku.

Afhenda 258 milljónir hluta á næstu vikum

Tilkynnt var um kaupin með hefðbundnum fyrirvara um samþykki Samkeppniseftirlitsins. Eftir tilkynningu Samkeppniseftirlitsins um að það telji ekki ástæðu til að aðhafast, segir í tilkynningu Heima að fyrirvaranum hafi nú verið aflétt.

Unnið sé að frágangi viðskiptanna og gera megi ráð fyrir því að afhending 258 milljón nýrra hluta í Heimum fari fram á næstu vikum.

Frekari grein verði gerð fyrir viðskiptunum á síðari stigum eftir því sem tilefni er til og samræmi við lögbundna upplýsingagjöf félagsins.