Ætla að vinda ofan af jafnlaunavottun

Diljá vísaði meðal annars til tillögu hagræðingarhóps ríkisstjórnarinnar um að taka „lítil skref til að létta á jafnlaunavottun“. Sagðist hún hafa margsinnis farið yfir það að gögn sem hún hafi „togað úr stjórnvöldum“ sýni svart á hvítu að enginn munur sé á kynbundnum launamun þar sem jafnlaunavottun hefur farið fram annars vegar og þar sem hún hefur ekki farið fram hins vegar.

Sjá einnig: „Vottunin verið kölluð lág­launa­vottun af gárungunum“

Þegar hún steig í pontu sagðist Þorbjörg ekki geta sleppt því að nefna að frumvarpið um jafnlaunavottun hafi verið lagt fram í ríkisstjórn Bjarna Benediktssonar, fyrrverandi formanns, Sjálfstæðisflokksins. Það hafi verið flaggskip þeirrar ríkisstjórnar og rætt hafi verið mikið um það af stolti og Bjarni hafa stært sig af því á erlendri grundu.

„Ég ætla að vera alveg heiðarleg og segja það: Ég deili ekki andúð Sjálfstæðisflokksins á jafnréttismálum. Ég er bara ekki þar,“ sagði Þorbjörg. Hún sagði að aðgerðir sem stuðla að launajafnrétti trufli hana ekki.

Umræðuna um jafnlaunavottunina má sjá hér á vef Aþingis. Hún hefst í kringum 1:31:00.

Hún sagði flestar þjóðir í kringum Íslands gera kröfur um einhverskonar jafnlaunavottunarkerfi og að kerfið hér á landi hefði borið árangur á undanförnum árum. Atvinnurekendur, stjórnendur og aðrir væru meira meðvitaðir um jafnréttismál og þekking hefði aukist.

Hægt væri að draga þá ályktun að vottunin hefði borið árangur.

„En, þetta kerfi hefur verið gagnrýnt og ég hef lagt við hlustir, því mér finnst skipta máli að stjórnvöld hlusti eftir gagnrýni og bregðist við henni þegar gagnrýnin er rökstudd.“

Því sagðist Þorbjörg vera að leggja fram drög að frumvarpi sem hefði það markmið að létta á kerfinu. Draga úr kostnaði atvinnulífsins og opinbera geirans. Hún sagðist þó ekki tilbúin til að lýsa því yfir að hætta ætti baráttunni fyrir jafnrétti. Sú barátta væri stöðug.

Meðal annars sagðist Þorbjörg vilja að vottunin fari sjaldnar fram og stefnt sé að því að hverfa frá lagaskyldu um jafnlaunavottun í núverandi mynd. Vinnan sé hafin.

„Ég er stolt af því að geta sagt: Ég hef heyrt gagnrýnina, ég hef meðtekið hana, ég ætla að bregðast við henni og mun leggja fram frumvarp í samráðsgátt.“

Þá sagðist Þorbjörg vita að Diljá væri áhugakona um að jafnlaunavottun yrði alfarið afnumin en það hefði þá kannski getað gerst í tíð síðustu ríkisstjórnar. Þá hafi þó engin skref verið stigin í þá átt.