Vakinn af „ölvunarsvefni“ inni á baði og brást ó­kvæða við

Þetta er meðal þess sem kemur fram í dagbók Lögregluna á höfuðborgarsvæðinu frá 17 í gær til 5 í morgun. Fimm gistu í fangageymslu lögreglu og alls eru 85 mál skráð í kerfinu á umræddu tímabili.

Í umdæmi lögreglustöðvar 1 sem nær yfir Miðbæ, Vesturbæ, Austurbæ og Nesið var ökumaður handtekinn grunaður um akstur undir áhrifum ávana- og fíkniefna. Við öryggisleit fannst töluvert af fíkniefnum og liggur grunur á því að maðurinn hafi verið að selja fíkniefni. Var hann vistaður í fangaklefa í þágu rannsóknar málsins.

Á sama svæði var annar ökumaður handtekinn, einnig grunaður um að aka ölvaður og var hann fluttur á lögreglustöð í viðeigandi ferli.

Einn einstaklingur var handtekinn í miðbænum grunaður um líkamsárás. Hann var vistaður í þágu rannsóknar málsins.

Ofsaakstur í úthverfum, fataþjófnaður og líkamsárás

Í Hafnarfirði og Garðabæ voru þrír ökumenn kærðir fyrir of hraðan akstur. Sá sem ók hraðast var að sögn lögreglu mældur á 116 km/klst þar sem hámarkshraði er 80 km/klst. Allir þrír eiga von á „vænlegri sekt“ að því er fram kemur í dagbók lögreglu.

Þá var annar ökumaður handtekinn grunaður um að aka ölvaður sem var fluttur á lögreglustöð í viðeigandi ferli.

Lögreglur af Lögreglustöð 3, sem sinnir verkefnum í Kópavogi og Breiðholti, handtóku einnig ökumann sem var grunaður um akstur undir áhrifum ávana- og fíkniefna. Sá reyndist þegar hafa verið sviptur ökuréttindum.

Einnig barst tilkynning um einstakling sem var að taka föt úr söfnunargámi en það mál var afgreitt á vettvangi. Jafnframt var tilkynnt um ölvaðan mann sem neitaði að yfirgefa strætisvagn. Hann fór sína leið eftir tiltal frá lögreglu.

Loks var tilkynnt um líkamsárás í umdæmi lögreglustöðvar 4, sem sinnir verkefnum í Árbæ, Grafarholti, Grafarvogi, Norðlingaholti, Mosfellsbæ, Kjósarhreppi og á Kjalarnesi. Það mál er enn í rannsókn.