Rapphljómsveit til rann­sóknar hjá hryðjuverkadeildinni

Félagarnir þrír í norður-írsku rappsveitinni Kneecap eru vel vanir því að ögra í textum sínum og sviðsframkomu og jafnvel því að háttsettir embættismenn reki hnýfilinn í framgöngu þeirra. Útásetningar hins opinbera bæði á Írlandi og Bretlandi hafa þó náð nýjum hæðum undanfarnar vikur og hefur stór alþjóðlegur hópur listamanna skorist í leikinn og undirstrikað mikilvægi listræns frelsis þeirra.

Leiðtogi Íhaldsflokksins hvatti til sniðgöngu

Lögreglan tilkynnti um rannsókn sína í dag á myndböndum sem þeim bárust, samkvæmt umfjöllun Guardian. Á myndböndunum má sjá sveitina kyrja stuðning sinn við Hamas og Hezbollah og hvetja til þess að ráða þingmönnum Íhaldsflokksins bana. Meðlimir sveitarinnar hafa þó þvertekið fyrir að vera hliðhollir hryðjuverkamönnum eða að þeir hvetji til ofbeldis í garð opinberra embættismanna.

Sveitin er þekkt um allan heim fyrir afdráttarlausa gagnrýni sína á nýlendustefnu Bretlands á Írlandi og víðar og baráttu sína til að bjarga írsku máli frá útrýmingu. Jafnframt hafa þeir gagnrýnt framferði Ísraela á Gasa og eru mjög opinskáir í stuðningi sínum við frelsisbaráttu Palestínumanna. Þeir spiluðu á tónleikum á Gauknum um árið og þar ræddi Vísir við þá.

Þessi nýjasta umferð hneykslunar á framferði sveitarinnar má rekja til atriðis hennar á bandarísku tónlsitarhátíðinni Coachella sem haldin var í Kaliforníu í síðasta mánuði. Þeir bundu enda á tónleika sína með því að varpa skilaboðum á skjá þar sem þeir fordæmdu hernað Ísraels á Gasasvæðinu og Vesturbakkanum.

„Ísrael er að framkvæma þjóðarmorð gegn palestínsku þjóinni. Það er með stuðningi Bandaríkjastjórnar sem veitir Ísrael vopn og fjármagn þrátt fyrir stríðsglæpi þeirra. Ísrael fari til fjandans. Frjáls Palestína,“ stóð á skjánum að tónleikunum loknum en stuðningur við framferði Ísraela í átökunum í kjölfar árásana 7. október er óvíða meiri en í Bandaríkjunum.

Kemi Badenoch leiðtogi breska Íhaldsflokksins hefur hvatt til þess að Kneecap verði meinað að spila á Glastonbury-hátíðinni og stjórnmálamenn á báðum vængjum hafa gagnrýnt framgöngu hljómsveitarmeðlima harkalega. Þeir hafa beðið fjölskyldur David Amess, fyrrverandi þingmanns Íhaldsflokksins sem myrtur var af fylgismanni Íslamska ríkisins árið 2021, og Jo Cox, fyrrverandi þingmanns Verkamannaflokksins sem myrt var árið 2016 af nýnasista, afsökunar en afsökunarbeiðni þeirra hefur verið tekið mistrúlega.

Boðskapur vonar

Í yfirlýsingu sem fjöldi listamanna hefur skrifað undir eru áhyggjur þeirra af viðbrögðum stjórnvalda tíundaðar. Meðal þeirra sem skrifað hafa undir yfirlýsinguna eru hljómsveitirnar Pulp og The Pogues.

„Í lýðveldi á enginn stjórnmálamaður eða flokkur að hafa rétt á því að ákveða hver megi og hver megi ekki spila á tónlistarhátíð eða -viðburði sem þúsundir njóta,“ segir meðal annars í yfirlýsingunni.

Sjálfir hafa meðlimir sveitarinnar beðist afsökunar á sumum ummæla sinna og segja rauða þráðinn í list sinni vera ást og von.

„Boðskapur Kneecap hefur alltaf verið, og er enn, boðskapur kærleika, umburðarlyndis og vonar. Þess vegna höfðar tónlist okkar til allra, þvert á kynslóðir, lönd, stéttir og menningar og fær hundruðir þúsunda til að mæta á tónleikana okkar. Engin ófrægingarherferð mun breyta því,“ segir í yfirlýsingu frá hljómsveitinni.