Tekjur Hand­boltapassans tvö­faldist: „Mjög raun­hæf á­ætlun“

HSÍ heldur úti sjón­varpsút­sendingum á Hand­boltapassanum og hefur fylgt því gríðarlegur kostnaður að byggja þann vettvang upp. 

„Núna erum við að komast á þann stað að áskrif­endur eru nokkur þúsund talsins,“ segir Jón, formaður HSÍ í samtali við íþróttadeild. „Við erum komin á þann stað að það fer að gefa okkur meiri tekjur heldur en að kostnað. Ef við lítum fram veginn er bara fullt af tækifærum þar.“

Þið áætlið auknar tekjur hjá HSÍ TV upp á 34 milljónir. Að tekjurnar fari úr 36 milljónum upp í 70 milljónir. Er það raun­hæf áætlun?

„Já það er bara mjög raun­hæf áætlun. Þó svo að Hand­boltapassinn sé nýr fyrir okkur eru fyrir­myndir af þessu úti í heimi. NBA er með sinn passa til að mynda og það er bara okkar að hlúa að passanum, gera hann skemmti­legan, setja efni inn í hann sem er aðlaðandi. Þannig náum við að fjölga áskrif­endum og halda áfram að byggja upp það góða starf sem hefur verið unnið í kringum passann. En það er engin launung að fyrsta árið var erfitt. Alls konar hnökrar sem komu upp. Árið í ár hefur verið miklu, miklu, miklu betra og að mörgu leiti mjög gott. Úr­slita­keppnin okkar er nú öll tekin upp á sjón­varps­vélum og öll gæði því mikil. Þetta lítur vel út.“

Kostnaður var hins vegar van áætlaður um 31 milljón. Fóru menn fram úr sér með þessum mikla kostnaði?

„Ég get ekki sagt neitt til um það núna. Ég er búinn að vera einn dag í em­bætti, er að setjast niður og er að fara að kryfja þetta. Talaðu við mig aftur eftir nokkra mánuði, þá skal ég svara þessari spurningu.“