Segist ekki transfóbískur en þó sam­mála J.K. Rowling

Þetta segir hann í færslu á bloggsíðu sinni. Tilefnið eru skrif Sveins Andra Sveinssonar, kollega Jóns í lögmennsku, sem sagði Sjálfstæðisflokkinn hafa leikið af sér með því að bjóða Jóni sjötta sæti á lista í Reykjavíkurkjördæmi norður.

„Í 6. sæti er frambjóðandi sem er stútfullur af rasisma og óvild í garð trans fólks,“ sagði Sveinn Andri á Facebook á dögunum og bætti við: „Vel gert Valhöll!“

Sveinn Andri reyni að hengja á hann merkimiða þegar rökin þrýtur

Á bloggsíðu sinni segir Jón að margir hafi reynt að hengja merkimiða á andmælendur sína, þegar skortir á að þeir geti fært rök fyrir máli sínu.

„Fáir kunna þá list betur en stjörnulögmaðurinn Sveinn Andri Sveinson, sem hefur tapað fleiri málum fyrir rétti en flestir aðrir núlifandi lögmenn.“

Hann segir Svein Andra hafa reynt að hengja á hann miða rasisma, íslamsandúðar og transfóbíu.

Rifjar upp einkar umdeilda tillögu á landsfundi

„Ég kippi mér ekki upp við svona bull og merkimiða enda mátt þola þá á annan áratug. Staðreyndin er hinsvegar sú að hefði verið tekið á hælisleitendamálum eins og ég hef lagt til m.a. með tillögu á Landsfundi 2015, þá væru engin vandamál hvað það varðar og útgjöld ríkisins í þann málaflokk væru nú um 50 milljörðum lægri á ári.“

Tillaga sú sem Jón vísar til var umdeild þegar hún var borin upp á landsfundi Sjálfstæðisflokksins. Jón var fyrsti flutningsmaður hennar og annar flutningsmaður var Gústaf Adolf Níelsson. Um var að ræða breytingartillögu við drög að landsfundarályktun og sneri að málefnum flóttafólks og innflytjenda.

Í henni sagði meðal annars:

„Það er engum til góða að rjúfa jafnvægið í samfélaginu og trufla aðlögun nýbúa með því að opna landið fyrir straumi á borð við þann sem nú flæðir að landamærum Evrópu og hlýtur fyrr eða síðar að verða stöðvaður, vonandi aðeins með friðsamlegum og sanngjörnum hætti. Íslendingar verða hvað sem öðru líður, að benda yfirvöldum Evrópusambandsins og annarra sem hlut eiga að máli á sérstöðu sína sem þrjúhundruð og þrjátíu þúsund manna þjóð og gæta þess að fá undanþágu frá óheftri för fólks af Evrópska efnahagssvæðinu til landsins.“

Gústaf púaður úr pontu

Tillaga þeirra félaga var ekki samþykkt og Gústaf var hreinlega púaður úr pontu þegar hann færði rök fyrir máli sínu.

„Ég fer í púltið og segi: Hér sé ég engan mann með túrban, hér sé ég engan blökkumann, hér sé ég enga konu með blæju. Um hvaða fjölmenningu eruð þið eiginlega að tala hér?“ Þá var það umsvifalaust notað að ég væri að tala illa um blökkumenn. En, ég var nú bara að lýsa því sem ég sá,“ sagði Gústaf í samtali við Vísi á sínum tíma.

Segist ekki transfóbískur, bara sammála J.K Rowling

Þá segir Jón varðandi meinta transfóbíu að sú nafngift sé röng. 

„Ég hef hinsvegar sömu skoðun í þeim málum og höfundur Harry Potter bókanna J.K. Rawlings [svo]. Svo því sé síðan bætt við sömu skoðun á lögunum um kynrænt sjálfræði og breska ríkisstjórnin, sem hafnaði að staðfesta slíka bulllöggjöf frá skoska þinginu. Þannig fellur allt um sjálft sig í málflutningi Sveins Andra og það ekki í fyrsta skipti.“

J.K Rowling hefur sætt harðri gagnrýni fyrir afstöðu sína til trans fólks og trans kvenna sérstaklega. Hún hefur ítrekað gefið í skyn að trans konur séu hættulegar öðrum konum og sagt að trans konur séu ekki konur.