Skilur ekki full­orðið fólk sem rífur Caitlin Clark niður

Hinn 39 ára gamli LeBron veit sitt hvað um skítkast en þrátt fyrir að vera einn hæfileikaríkasti körfuboltamaður allra tíma hefur hann varið gagnrýndur nær allan sinn feril. Hann hefur nú stigið fram og staðfest að hann sé mikill aðdáandi hinnar 22 ára gömlu Clark sem spilar í dag með Indiana Fever eftir magnaðan háskólaferil.

LeBron James ræddi Clark og skítkastið í hennar garð í hlaðvarpi sínu og JJ Reddick, Mind the Game. Hlaðvarpið rataði í fréttir hér á Vísi þegar í ljós kom að Reddick er meðal þeirra þriggja sem Los Angeles Lakers horfir til sem nýs þjálfara liðsins. Það er áhugavert fyrir þær sakir að LeBron spilar með Lakers og þá eru þeir félagar fæddir sama ár, 1984.

„Eitt af því sem ég elska mest við hvað hún kemur með að borðinu er það að nú vilja fleiri horfa á íþróttina. Fleiri einstaklingar kveikja á sjónvarpinu og fylgjast með. Ekki reyna að flækja þetta, Caitlin Clark er ástæðan fyrir því að fullt af jákvæðum hlutum eru að gerast í WNBA-deildinni,“ segir LeBron í nýjasti þætti hlaðvarpsins.

Clark hefur aðeins spilað fjóra leiki í deildinni til þessa en gríðarlegur áhugi hefur verið á leikjum hennar og þá seldust treyjur Indiana Fever eins og heitar lummur eftir að ljóst var að félagið myndi velja Clark í nýliðavalinu.

LeBron var líkt og Clark valinn fyrstur í nýliðavalinu á sínum tíma. Hann var þá þegar undir gríðarlegri pressu en hið virta íþróttatímarit Sports Illustrated gekk svo langt að kalla hann „Hinn útvalda“ þegar hann var enn nokkrum árum frá því að geta tekið þátt í nýliðavali NBA-deildarinnar.

„Hvað hana persónulega varðar þá tel ég ekki að hún ætti að blanda sér í neitt af því sem er sagt. Hún á bara að fara út og skemmta sér. Ég held með henni af því ég hef verið í hennar skóm áður, ég hef gengið þennan veg. Ég vona að hún standi sig frábærlega,“ bætti LeBron við.

Þá nýtti James tækifærið og lét fólkið sem hefur gagnrýnt Bronny, 19 ára son hans, undanfarið heyra það. Bronny James mun taka þátt í nýliðavali NBA-deildarinnar í ár og hefur LeBron ítrekað sagst vilja spila með syni sínum áður en hann leggur körfuboltaskóna á hilluna.

„Það er mjög lítill hluti karl- og kvenmanna sem fær að upplifa drauminn og spila íþróttina sem það elska að atvinnu. Samt erum við með fullorðna karlmenn og fullorðnar konur að gera allt sem þau geta til að koma í veg fyrir það. Það er það skrýtna við þennan heim, en það er eins og það er. Ég er glaður að Caitlin er með höfuðið rétt skrúfað á.“