Bréf First Wa­ter veldur ringul­reið í bæjar­stjórn Ölfuss

Vísir hefur greint skilmerkilega frá þessu en Gestur Þór Kristjánsson, forseti bæjarstjórnar Ölfuss, hefur lýst því yfir að honum þyki tímasetning bréfsins furðuleg.

Elliði er á sama máli. „Okkur barst bréf sem lá fyrir á fimmtudagsmorgni og þá voru tveir dagar í að atkvæðagreiðsla hefjist meðal íbúa. Þetta er ekki bréf frá hverjum sem er heldur First Water sem er umsvifamikill í bæjarfélaginu, sem hefur aðgang að skýrslum sem við kannski ekki þekkjum,“ segir Elliði.

Hann segir bréfið hafa komið þeim í bæjarstjórninni algjörlega í opna skjöldu.

„Afar margir hafa áttað sig á að þarna væri stór framkvæmd í námdun. Þeir segjast ekki hafa vitað af þessu og bíða með það að gera grein fyrir áhyggjum sínum þar til tveir dagar eru í atkvæðagreiðslu.“

Engar athugasemdir frá öðrum fyrirtækjum

Þó Elliði setji spurningarmerki við tímasetninguna gerir hann ekki athugasemd við efnislega athugasemd þeirra. Að ekki sé talað um ef hún byggir á gögnum sem bæjarstjórnin hefur ekki séð áður. „Við getum ekki látið eins og við höfum ekki séð þetta bréf. Eina leiðin til að koma þessu bréfi í stjórnsýslulegan farveg er að halda aukafund í bæjarstjórn.“

Elliði segist ekki hafa svör við því hvort búast megi við því að atkvæðagreiðslunni verið skotið á frest?

„Ég á ekki svör við því, fundurinn fer fram í dag og þetta þarf að ræða. Hvernig vilja bæjarfulltrúar bregðast við, vilja þeir láta eins og þetta bréf hafi ekki borist eða vilja þeir skoða þetta nánar. Við sjáum þó öll að það eru þrjú svipað stór verkefni af sömu tegund að fara í gang. First Water, Geo Salmo og landeldisstöðin Þór. Öll eru þessi fyrirtæki að hefja framleiðslu á laxi með sambærilegum aðferðum, á landi. Milli landeldisstöðvarinnar Þór og Geo Salmo er Heidelberg með lóð. Hvorugt þeirra fyrirtækja hefur gert nokkrar athugasemdir við starfsemi Heidelberg og bara núna í gær fékk ég bréf frá öðru fyrirtækinu þar sem fram kom að það óskaði Heidelberg alls hins besta.“

First Water sé hins vegar með lóð sem er fjærst starfsemi Heidelbergs. 

Sveitarstjórnarfólk ræður för

Elliði segir að það verði að huga að því að þetta útspil First Water bitni á öðrum.

„Að það sé verið að reisa einhvern varnagla gagnvart öðrum sem telja ekki ástæðu til að gripið verði til aðgerða. En við munum fara yfir þetta á vandaðan máta og það veit ég að sex af sjö bæjarfulltrúum hafa ekkert tjáð sig um málið, hvorki með né á móti. 

Í huga bæjarstjórnar snýst málið ekki um það hvort hér rís mölunarverksmiðja eða ekki heldur gæta að heiðarlegum og vönduðum vinnubrögðum sem stenst þær kröfur sem við gerum til vandaðrar stjórnsýslu.“

Elliði segir sveitarstjórnarfólk í þeirri stöðu að það hafi engin áhrif nema á lögformlegum fundum, það sé þeirra leið, þeirra hlutverk. „Það kemur enginn til með að stýra þessari aðgerð nema sveitarstjórnarfólk í Ölfusi, hvorki First Water, Heidelberg né Landvernd stýrir þessu máli. Það gerir bæjarstjórn Ölfus með hagsmuni bæjarbúa að leiðarljósi.“