For­seti ÍSÍ selur hönnunarhús í Garða­bæ

Um er að ræða 300 fermetra hús á tveimur hæðum staðsett á 924 fermetra lóð. Ásett verð er 230 milljónir króna. Húsið er byggt árið 1995 og var engu til sparað þegar það var byggt.

Húsið er einstakt fyrir margar sakir en helstu kostir þess eru sérsmíðaðar innréttingar hannaðar af Pétri Hafsteini Birgissyni innanhússarkitekt. Þá er gegnheilt Yberaro parket með Jatoba skrautlistum á gólfum. 

Björt rými og útsýni

Gengið er inn í flísalagða og rúmgóða forstofu. Stórt og opið alrými er á hæðinni sem hægt er að loka af með tvöfaldri millihurð. Að auki eru tvö svefnherbergi og baðherbergi með útgengi á skjólsæla verönd með heitum potti. 

Veglegur parketlagður stigi leiðir upp á aðra hæð hússins sem skiptist í eldhús, tvær samliggjandi og bjartar stofur, svefnherbergisgang og stórt baðherbergi. Efri hæð hússins er 159,8 fermetrar að stærð með mikilli lofthæð og fallegu útsýni yfir bæinn.

Nánari upplýsingar um eignina má finna á fasteignavef Vísis.