Níu hundruð fé­lags­menn Eflingar gætu lagt niður störf í mars

Sólveig Anna Jónsdóttir, formaður Eflingar, segir að trúnaðarbrestur hafi orðið þegar Samtök atvinnulífsins hófu að semja við fagfélögin svokölluðu um launaliðinn sem áður hafði náðst samkomulag um. Sigríður Margrét Oddsdóttir er framkvæmdastjóri Samtaka atvinnulífsins.

„Okkur þykir mjög leitt ef þau upplifa það sem svo að þeim hafi verið sýnd vanvirðing af því það er svo sannarlega ekki okkar ætlun. Það skiptir máli að það komi fram að launaliðurinn sem snýr að Eflingu hefur svo sannarlega ekki breyst og kostnaðarmat samninganna hefur heldur svo sannarlega ekki breyst,“ segir Sigríður Margrét.

Boðað hefur verið til fundar hjá ríkissáttasemjara í fyrramálið. Á mánudag greiða félagsmenn Eflingar, sem starfa við ræstingar, atkvæði um ótímabundið verkfall sem til stendur að hefjist 18. mars en það nær til um níu hundruð starfsmanna á höfuðborgarsvæðinu.

„Ræstingin, hún er náttúrulega undirstaða alls. Það er ekki hægt að halda verslunum opnum, það er ekki hægt að vera með fyrirtæki í gangi það er ekki hægt að vera með stofnanir opnar nema að ræst sé. Á mörgum stöðum er það þannig að ef meira en þrír dagar líða á milli þess að það sé ræst þá verður einfaldlega að loka þannig að, já, þetta er svo sannarlega eitt af þessum störfum sem heldur hér öllu gangandi en er þó, sökum þess að þetta eru hefðbundin kvennastörf, höfð neðst í stigveldinu. Þarna er fólkið sem hefur það verst en skiptir á endanum langmestu máli. Ég held að verkfallið muni bíta fast á öllum sviðum samfélagsins,“ segir Sólveig Anna.

Forsvarsmenn Eflingar hafa þegar kannað verkfallsvilja félagsmanna sem starfa við ræstingar en atkvæðagreiðslan á mánudaginn næstkomandi sker vitaskuld endanlega úr um það. Áttatíu prósent félagsmanna Eflingar sem starfa við ræstingar hafa sagst reiðubúin að leggja niður störf.

„Þetta eru hátt í 80% konur og mikið af innflytjendum. Staða þeirra er merkjanlega mun verri en staða annarra þegar við skoðum til dæmis niðurstöður könnunar Vörðu sem ég hvet reyndar alla til þess að skoða. Bæði eru launakjörin léleg, starfsaðstæðurnar jafnframt mjög erfiðar þannig að SGS og Efling ásamt öðrum í breiðfylkingunni gerðu það strax að sínu markmiði í þessum kjarasamningum að þarna yrði að nást mikill árangur,“ segir Sólveig Anna.

Hvað þyrfti til að afstýra verkfalli?

„Það sem þarf til er að Samtök atvinnulífsins mæti okkur við samningsborðið með þann ríkulega samningsvilja með sér sem þau hafa sýnt hærri launuðu karlahópunum innan Alþýðusambandsins, við þurfum að ná ásættanlegum og góðum árangri varðandi kjör ræstingafólks og það eru ýmis önnur mál sem þarf að ljúka með góðum árangri,“ segir Sólveig Anna.