Innlent

Ítalskur karl­maður hand­tekinn á Ís­landi grunaður um barna­níð

Kolbeinn Tumi Daðason skrifar
Karlmaðurinn er grunaður um að hafa brotið á rúmlega fimmtíu ítölskum stúlkum.
Karlmaðurinn er grunaður um að hafa brotið á rúmlega fimmtíu ítölskum stúlkum. Getty

Tæplega fimmtugur ítalskur karlmaður búsettur á Íslandi hefur verið handtekinn grunaður um að hafa brotið á að minnsta kosti fimmtíu ungum stúlkum.

Í frétt Rai News segir að maðurinn hafi undir dulnefni haft samband við fjölda ungra stúlkna á ýmsum samfélagsmiðlum og kúgað þær til að senda sér kynferðislegar myndir.

Miðillinn vísar í svör lögreglu sem telur að fórnarlömb mannsins á Ítalíu séu í það minnsta fimmtíu. Rannsóknin sé viðamikil og hafi verið í gangi í yfir þrjú ár. Það hafi flækt fyrir rannsókninni að maðurinn hafi notað mörg dulnefni og erlend símanúmer.

Maðurinn er í haldi lögreglu grunaður um vörslu kynferðislegs efnis af börnum undir lögaldri með því að hafa villt á sér heimildir og haft í hótunum.

Óttast er að fórnarlömb mannsins séu mun fleiri. Þau rúmlega fimmtíu eru aðeins þau sem hafa haft samband við lögregluna á Ítalíu. Fórnarlömbin gætu verið víðar í heiminum.

Til stendur að framselja manninn til Ítalíu að því er fram kemur í ítölskum miðlum og er vinna við það þegar hafin.

Lögreglumál Ítalía Ofbeldi gegn börnum
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið