Dapur­legt ef stjórn­völd ætla að draga í land í kjara­við­ræðum vegna Grinda­víkur

Ragnar Þór Ingólfsson formaður VR segir viðræður við Samtök atvinnulífsins ganga alltof hægt og lítið hafi miðað á um þriggja klukkustunda fundi hjá ríkissáttasemjara í gær. Þá væri dapurlegt að heyra skilaboðin frá Bjarna Benediktssyni formanni Sjálfstæðisflokksins og utanríkisráðherra í Ríkissjónvarpinu í gær, þar sem hann hefði sagt að ríkið gæti ekki komið til móts við allar kröfur verkalýðshreyfingarinnar vegna kostnaðar þess af stöðunni í Grindavík. Kostnaður ríkisins vegna uppkaupa eigna í Grindavík væri ekki mikill í samanburði við margt annað.

„Eins og til dæmis stuðning til fyrirtækja í heimsfaraldrinum. Þær aðgerðir sem var farið í hér eftir hrun. Ástarbréfin milli ríkisins og Seðlabankans upp á 370 milljarða og svo framvegis og framvegis. Það eru til 52 til 54 milljarðar í náttúruhamfarasjóði. Þetta er ekki eins stórt og mikið eins og stjórnvöld vilja láta vera,“ segir Ragnar Þór.

En til samanburðar hefur verið talað um að kröfur breiðfylkingarinnar á að komu stjórnvalda myndu kosta um 25 milljarða króna, með hækkun barna- og vaxtabóta meðal annars.

„En ætla að fara nota síðan ástandið í Grindavík til að klippa af mögulegum aðgerðum inn í kjarasamninga, þar sem fólk er í rauninni að berjast í bökkum, er bara mjög dapurleg pólitísk staða,“ segir formaður VR.

Nú þegar vika væri eftir af friðarskyldu á almenna vinnumarkaðnum og hálfur mánuður í næsta vaxtaákvörðunardag Seðlabankans væru Samtök atvinnulífsins og ríkið að draga lappirnar í kjaraviðræðunum.

„Ég er farinn að efast um að Samtök atvinnulífsins og stjórnvöld hafi hreinlega trú á að hægt sé að ná niður verðbólgu og vöxtum hratt og örugglega. Og það er sérstaklega dapurlegt því auðvitað er það hlutverk stjórnvalda að leiða slíkt verkefni og róa að því öllum árum að hér náist stöðugleiki í okkar samfélagi og vextir og verðbólga fari niður,“ segir Ragnar Þór. Ef stjórnvöld ráði ekki við verkefnið hljóti að fara að styttast í kosningar.

Vonandi breyti Samtök atvinnulífsins sinni nálgun og viðhorfi þannig að hægt verði að ná lendingu í viðræðunum áður en núgildandi samningar og um leið friðarskylda á vinnumarkaði renni út eftir um viku. Þá geti vaxtaákvörðun Seðlabankans hinn 7. febrúar næst komandi haft úrslitaáhrif á stöðuna.

Hvað einmitt ef Seðlabankinn ákveður að hækka vexti?

„Ég held að það sjái það allir að þá er þessari tilraun okkar væntanlega formlega lokið,“ segir Ragnar Þór Ingólfsson. Fundur breiðfylkingar stéttarfélaga innan ASÍ og SA hófst hjá ríkissáttasemjara klukkan 11.