Innlent

Á­fram líkur á eld­gosi

Oddur Ævar Gunnarsson skrifar
Skammt frá Grindavík í gær.
Skammt frá Grindavík í gær. Vísir/Vilhelm

Áfram eru líkur á eldgosi á Reykjanesskaga og er líklegasti staðurinn ef til þess kemur austan Sýlingarfells. Þetta er meðal þess sem fram kemur í tilkynningu frá Veðurstofunni.

Þar kemur fram að jarðskjálftavirkni hafi áfram farið hægt minnkandi síðustu tvo sólarhringa. Í gær mældust um 340 skjálftar nærri kvikuganginum og frá miðnætti í dag hafa um 150 skjálftar mælst. Flestir skjálftanna eru smáskjálftar undir 1,0 að stærð á svæðinu austan við Sýlingarfell.

Þenslan yfirgnæfir merkin

Þá hefur dregið úr hraða landriss við Svartsengi síðustu daga. Hraði þess er þó áfram þó nokkur, eða allt að einn sentímetri á sólarhring.

Aflögunargögn og niðurstöður líkanreikninga benda til þess að megnið af aflöguninni komi til vegna innflæðis undir Svartsengi frekar en innflæðis í kvikuganginn. Segir í tilkynningunni að með öðrum orðum yfirgnæfi þenslan við Svartsengi nú merkin við kvikuganginn.

Hægt dregur þó úr öllum færslum. Innflæðið í kvikuganginn einskorðast við svæðið austan við Sýlingarfell. Þótt áfram dragi úr aflögun og skjálftavirkni eru ennþá taldar líkur á eldgosi og ef til þess kemur er líklegasti staðurinn austan Sýlingarfells.

Eldgos og jarðhræringar Eldgos á Reykjanesskaga
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið