Innlent

Dregið úr jarð­skjálfta­virkni

Viktor Örn Ásgeirsson skrifar
Engin skýr merki eru um kviku að færast nær yfirborði.
Engin skýr merki eru um kviku að færast nær yfirborði. Vísir/Vilhelm

Nokkuð hefur dregið úr jarðskjálftavirkni á Reykjanesi síðan klukkan 18 í kvöld og skjálftarnir sem nú mælast eru minni. Virknin er þó enn töluverð og um 450 skjálftar hafa mælst á svæðinu í kringum Þorbjörn frá klukkan 15 í dag. Engin merki eru um að kvika sé að brjóta sér leið upp á yfirborð.

Nýjustu GPS gögn sýna enga hröðun á landrisi í kjölfar skjálftavirkninnar í dag og það gera gervihnattagögn ekki heldur. Engin merki sjást heldur um gosóróa. Bæði GPS gögn og gervitunglamyndir staðfesta þó að kvika haldi áfram að flæða í innskotið sem myndast hefur undir svæðinu norðvestur af Þorbirni á um kílómetra dýpi. Þetta kemur fram í tilkynningu frá Veðurstofunni.

Væri kvika að brjóta sér leið upp á yfirborðið sæist það í grynnkandi skjálftavirkni og vaxandi óróa, sem í þessu samhengi merkir afar tíða og litla skjálfta. Samhliða því ætti að mælast aflögun, eða gliðnun, á yfirborði á GPS mælum.

Veðurstofan mun halda áfram að vakta svæðið og farið var yfir stöðuna á fundi með Almannavörnum fyrr í kvöld. Gera má ráð fyrir áframhaldandi skjálftavirkni og þá má einnig gera ráð fyrir gikkskjálftavirkni á næstu dögum vegna kvikuinnskotsins. Fólk er hvatt til að fara varlega nærri fjallshlíðum á svæðinu af hættu við grjóthrun.

Eldgos og jarðhræringar Eldgos á Reykjanesskaga
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið