Gert að greiða tuttugu og sex milljónir króna í tryggingu

Tryggingin samsvarar tæplega 26,5 milljónum króna en lögmenn Trumps, saksóknarar og dómari funduðu um trygginguna í dag. Búist er við að Trump gefi sig fram í Fulton-sýslu seinna í vikunni þar sem hann og aðrir sakborningar hafa frest fram á föstudag.

Einnig kom fram í kvöld að alríkissaksóknarar sem hafa einnig ákært Trump vegna tilrauna hans til að snúa niðurstöðum kosninganna eru mótfallnir því að réttarhöldin gegn honum fari ekki fram fyrr en í apríl 2026.

Bannað að ógna vitnum eða öðrum á samfélagsmiðlum

Í nýjum dómsskjölum frá Georgíu kemur fram að dómari hefur skipað Trump að gera ekki tilraunir til að ógna öðrum sakborningum eða vitnum eða reyna að hefta framgang réttvísinnar á nokkurn hátt. Dómarinn tekur fram að hann má ekki hóta eða ógna fólki á beinan eða óbeinan hátt á samfélagsmiðlum eða annarsstaðar.

Hann má hvorki setja sjálfur inn færslur sem hægt væri að túlka sem ógnun, né dreifa slíkum færslum annarra. Trump mun því þurfa að halda aftur af sér, annars gæti hann þurft að sitja inni en hann hefur ítrekað verið sakaður um ógnanir gegn saksóknurum, dómurum og öðrum í tengslum við hinar ákærurnar gegn honum.

Auk Trumps voru átján aðrir ákærðir í Fulton-sýslu en ákærurnar byggja á RICO-lögunum svokölluðu. Þau voru upprunalega sett til að auðvelda yfirvöldum að berjast gegn skipulagðri glæpastarfsemi.

Nokkrir af þeim sem eru ákærðir eru sakaðir um að hafa reynt að stela kjörgögnum og eiga við kosningavélar. Fani Willis, saksóknari, hefur lagt til að réttarhöldin hefjist í mars.

Vilja hefja réttarhöld 2. janúar

Trump hefur einnig verið ákærður vegna kosninganna af Jack Smith, sérstökum rannsakanda Dómsmálaráðuneytisins. Lögmenn hans fóru nýverið fram á að þau réttarhöld færu fram í apríl 2026 en sú beiðni var byggð á því að lögmennirnir þyrftu að fara yfir gífurlegt magn gagna vegna málsins.

Þá stendur Trump í baráttu um tilnefningu Repúblikanaflokksins vegna forsetakosninganna í nóvember á næsta ári og er hann líklegur til að bera sigur úr býtum.

Lögmenn Trumps sögðust hafa fengið 11,5 milljónir blaðsíðna til að fara yfir fyrir réttarhöldin og þeir þyrftu mikinn tíma til þess.

„Hagsmunir almennings felast í réttlæti og sanngjörnum réttarhöldum, ekki flýti til sakfellingar,“ sögðu lögmenn fyrrverandi forsetans í greinargerð sinni.

Smith og saksóknarar hans segjast mótfallnir því að réttarhöldunum verði frestað svo lengi og segja að mest af þeim gögnum sem lögmenn Trumps þurfi að fara yfir hafi verið opinber um langt skeið og þar að auki væru margar af þessum blaðsíðum afrit af öðrum. Það ætti ekki að vera eins erfitt og lögmenn Trumps segja að fara yfir þau.

Saksóknararnir vilja að réttarhöldin hefjist þann 2. janúar á næsta ári., samkvæmt AP fréttaveitunni.

Trump hefur lýst yfir sakleysi sínu og lögmenn hans hafa sagt að tjáningarfrelsi hans leyfi honum að segja ósatt um kosningarnar. Saksóknarar segja hins vegar að ákæran snúist ekki eingöngu um hvað Trump sagði um forsetakosningarnar 2020 heldur um hvað hann gerði.