Um­ferð á hring­veginum aldrei verið meiri

Þetta kemur fram í fréttatilkynningu á vef Vegagerðarinnar.

Þar segir að umferðin í júlímánuði hafi verið um sjö prósentum meiri en í sama mánuði árið 2022. Sú aukning varð til þess að aldrei hefur mælst meiri umferð í júlí. Ekki nóg með það heldur er þetta mesta umferð sem hefur mælst í einum mánuði frá því mælingar hófust.

Umferðin á hringveginum er mæld með sextán lykilteljurum sem dreifast um höfuðborgarsvæðið, Suðurland, Norðurland, Austurland og Vesturland. Í tilkynningunni segir að tæplega 125 þúsund ökutæki hafi farið yfir mælisniðin sextán á hverjum sólarhring.

Þá segir einnig að „svo óvanalega vildi til að mesta aukningin mældist á og við höfuðborgarsvæðið, en á því svæði mælist alla jafna litlar sveiflur.“ Skýringin á þessu kunni að vera sú að á síðasta ári var óvenju lítil umferð á höfuðborgarsvæðinu miðað við árstíma.

Hins vegar hafi umferðin um Norður- og Austurland dregist saman miðað við sama mánuð á síðasta ári, eða um 1,9 prósent og 4,5 prósent. Á þessum svæðum mældist einnig samdráttur í umferð á síðasta ári samanborið við árið 2021.