Silli með besta bitann enn og aftur og hleypir öðrum að á næsta ári

„Það er vont en það venst,“ segir Silli hlæjandi spurður hvort ekki sé erfitt að vera alltaf bestur ár eftir ár. Rætt var við Silla í kvöld­fréttum Stöðvar 2 í kvöld.

„Nei nei, þetta er bara gaman. Maður upp­sker eins og maðir sáir og gerir. Það er gaman að sjá þessa miklu vinnu og maður upp­sker eftir því.“

Hvað var á vinnings­borgaranum í ár?

„Heyrðu, það var gæsa­ham­borgari með reyktri gráð­osta­sósu, sultuðum rauð­lauk með trönu­berjum, rucola og brauð sem ég fæ sér­bökuð frá Deig í Tryggva­götu.“

Silli keppir á heims­meistara­mótinu í götu­bita á Þýska­landi í septem­ber. Hann lenti í öðru sæti í fyrra og það stendur ekki á svörum þegar hann er spurður hvert hann stefni í ár.

„Það var ein­mitt planið að vinna í ár til þess að komast aftur út til þess að sigra keppnina og það verður í lok septem­ber. Þannig að það verður farið með gæsa­ham­borgarann og eitt­hvað eitt annað sem á eftir að smíða.“

Við höfum heyrt grínast með það að þú fáir ekki að taka þátt hér á næsta ári eftir að hafa unnið fjögur ár í röð, en muntu mæta hérna að ári?

„Ég var búinn að á­kveða sjálfur fyrir þessa keppni að ef það tækist að vinna í ár þá myndi ég vera sem dómari á næsta ári. Þannig að þetta er komið gott, maður verður að hleypa öðrum að líka.“