Formúla 1

Charles Leclerc gæti komið í stað Lewis Hamilton

Jón Már Ferro skrifar
Lewis Hamilton og Charles Leclerc í aðdraganda kappakstursins í Jeddah, Sádi-Arabíu, í mars síðastliðnum.
Lewis Hamilton og Charles Leclerc í aðdraganda kappakstursins í Jeddah, Sádi-Arabíu, í mars síðastliðnum. Getty/Eric Alonso

Toto Wolff, framkvæmdarstjóri Mercedes, segir að Charles Leclerc, ökuþór Ferrari, sé undir smásjá liðsins. Samningsviðræður Mercedes og Lewis Hamilton ganga illa.  

Samningur Hamilton, helsta ökuþórs Mercedes og sjöfalds heimsmeistara, rennur út eftir yfirstandandi tímabil, en hann hefur gagnrýnt þróunina á bifreið Mercedes. Bílaframleiðandinn stefnir á að gera bílinn betri og Hamilton segist ekki geta beðið eftir uppfærslunni í aðdraganda Molina kappakstursins á Ítalíu 21. maí næstkomandi.

Fjölmiðlar á Ítalíu greindu frá því að Leclerc hefði rætt við Mercedes en Leclerc neitaði fyrir það síðastliðin fimmtudag og sagði að enn þá hefðu engar viðræður átt sér stað. Jafnframt segist hann vera einbeittur að því að gera vel fyrir Ferrari og virða samning sinn við bílaframleiðandann.

Samningur Leclerc við Ferrari rennur út á næsta ári en framtíð hans gæti ráðist á næstunni.

„Það er enginn sem efast um gæði Charles og hann er frábær náungi. Hann er hundrað prósent skuldbundinn Ferrari og við erum hundrað prósent skuldbundnir því að skrifa undir við Lewis,“ segir Toto Wolff.

Leclerc endaði í öðru sæti ökuþóra í fyrra, á eftir heimsmeistaranum, Max Verstappen. Leclerc hefur nítján sinnum endað á ráspól á ferli sínum í Formúlu 1, einu sinni oftar en Verstappen. 

Margir sérfræðingar telja Leclerc vera besta og hraðasta ökuþórinn en oftar en ekki voru slæmar ákvarðanir Ferrari sem komu í veg fyrir að hann hafi unnið fleiri keppnir á síðasta tímabili.


Tengdar fréttir

Leclerc á ráspól í Aserbaídsjan

Charles Leclerc á Ferrari verður á ráspól þegar farið verður af stað í Bakú í Aserbaídsjan í Formúlu 1 á morgun. Tvöfaldi heimsmeistarinn Max Verstappen ræsir annar, en þetta verður þriðja árið í röð sem Leclerc ræsir fremstur í Bakú.

Óvissa uppi varðandi framtíð Hamilton hjá Mercedes

Samningur sjöfalda Formúlu 1 heimsmeistarans Lewis Hamilton við Mercedes rennur út eftir yfirstandandi tímabil og enn virðist ekkert bóla á nýjum samningi. Þrátt fyrir yfirlýsingar ökumannsins og liðsstjóra Mercedes hafa sögusagnir um mögulegt brotthvarf Hamilton frá þýska risanum bara orðið háværari eftir því sem vikurnar líða.




Fleiri fréttir

Sjá meira


×