Barbie nú með Downs

Undanfarin ár hefur Barbie meðal annars verið í hjólastól, með gerviútlim, með heyrnatæki og svo mætti lengi telja. Auk þess hafa Barbie-dúkkur verið styttri, hærri, feitari og grennri en hin klassíska Barbie-dúkka. Það er jú heldur ólíklegt að vera í laginu eins og sú upprunalega en samkvæmt vísindamönnum í Háskóla Suður-Ástralíu (University of South Australia) eru líkurnar á að vera með sömu líkamsbyggingu og Barbie ein á móti hundrað þúsund. 

Fram kemur í frétt BBC um málið að nýjasta viðbótin sé enn eitt skrefið í að gera öllum börnum kleift að sjá sig í Barbie. Mattel hannaði viðbótina í samvinnu við Bandarísku Downs-heilkennissamtökin. Þá komu sérfræðingar sömuleiðis að hönnuninni til að tryggja að dúkkan líkist raunverulega konum með Downs, allt frá andlitsfalli að líkamsgerð.