Rýmingu af­létt

Snjóflóðahætta fer þverrandi á Austurlandi og hlýnað hefur í veðri. Vonir standa til að hægt verði að aflétta rýmingu í landshlutanum öllum fljótlega. 

Björgunarsveitarmenn hvaðanæva að halda heim á leið í dag. Björgunarmenn stukku til í vikunni og komu meðal annars frá Höfn, Hellu, Vestmannaeyjum, Eyrarbakka, Grindavík og úr Skagafirði til að aðstoða. Flestir munu yfirgefa Egilsstaði með flugi klukkan 16.

Víðir Reynisson yfirlögregluþjónn almannavarna sagði í samtali við fréttastofu í dag að veðurspá væri hagstæð. Stytta ætti upp eftir hádegi.

„Snjóflóðahættan fer óðum minnkandi og við erum bjartsýn á að það verði hægt að fara í afléttingar, að minnsta kosti vegna snjóflóðarýminga. Það er þröngt á einhverjum fjallvegum og snjór í köntum, þannig að það þarf að gæta varúðar þar. Svo er eitthvað um vatnsskemmdir á vegum og hámarkshraði verið tekinn niður.“