Viðskipti innlent

Flestir þekkja MS og svo Apple

Bjarki Sigurðsson skrifar
MS virðist vera fyrsta vörumerkið sem fólki dettur í hug þegar það er beðið um að nefna vörumerki úr sínu daglega lífi.
MS virðist vera fyrsta vörumerkið sem fólki dettur í hug þegar það er beðið um að nefna vörumerki úr sínu daglega lífi.

Landsmenn nefna oftast vörumerki MS þegar þeir eru beðnir um að nefna það vörumerki úr sínu daglega lífi sem þeim dettur fyrst í hug. Næst á eftir koma bandarísku merkin Apple og Nike.

Þetta kemur fram í niðurstöðum könnunar sem Hugverkastofa fékk Maskínu til að framkvæmda. Niðurstöðurnar voru kynntar á ÍMARK deginum á föstudaginn. 

Efst á blaði var MS en rúmlega 23 prósent svarenda nefndu mjólkurvöruframleiðandann. Þar á eftir komu fjögur erlend merki, Apple með 17,3 prósent, Nike með 16,2 prósent, Samsung með 13,1 prósent og Coca Cola með 12,3 prósent. 

Engin önnur vörumerki komust yfir tíu prósentin en á topp tíu listanum má einnig finna Bónus, Krónuna, 66° Norður, Toyota og Ikea. 

Mjólkursamsalan ehf. fékk orð- og myndmerkið MS skráð í janúar 1990 fyrir auglýsingastarfsemi; rekstur og stjórnun fyrirtækja og skrifstofustarfsemi og fyrir vinnslu og meðferð efna og hluta. Skráning á vörumerki veitir eiganda þess einkarétt til að nýta merkið fyrir ákveðnar vörur og þjónustu. Algengustu vörumerki eru orðmerki og myndmerki en hægt er að fá margar gerðir vörumerkja skráð, til dæmis hljóðmerki, litamerki og staðsetningarmerki. Einfalt er að sækja um skráningu vörumerkja á vef Hugverkastofunnar.

Könnunin var lögð fyrir Þjóðgátt Maskínu, sem er þjóðhópur fólks (e. panel) sem valinn er með tilviljunarkenndum hætti úr Þjóðskrá. Könnunin fór fram á netinu og voru svarendur 18 ára og eldri af öllu landinu.

Við úrvinnslu voru gögnin vegin til samræmis við tölur Hagstofunnar til þess að hópurinn endurspeglaði þjóðina út frá kyni, aldri, búsetu og menntun. Könnunin fór fram 13. - 18. janúar 2023 og svarendur voru 954 talsins.

Auglýsinga- og markaðsmál Neytendur IKEA Apple Samsung


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið