Ragnar Jónasson hlaut Palle Rosenkrantz -verðlaunin

Greint er frá þessu í tilkynningu frá bókaútgefandanum Bjarti & Veröld.

Palle Rosenkrantz -verðlaunin hafa verið veitt frá árinu 1987. Segir í tilkynningu að um sé að ræða annað skipti sem höfundur hlýtur þau fyrir fleiri en eina bók en Ruth Rendell fékk þau árið 1994 fyrir Crockodile Bird og King Salomon‘s Carpet (sem hún skrifaði undir dulnefni). Þá er Ragnar annar íslenski höfundurinn sem fær þennan heiður en Yrsa Sigurðardóttir var verðlaunuð árið 2017 fyrir DNA.

Í umsögn dómnefndar sagði: „Í þríleik Ragnars, Dimmu, Drunga og Mistri, eru bæði náttúra og íbúar Íslands lífshættuleg, sérstaklega úti í auðninni þar sem enginn heyrir þegar hrópað er á hjálp. Rannsóknarlögreglukonan Hulda sem við fylgjum frá vöggu til grafar kemst heldur ekki ósködduð í gegnum lífið, þannig að eftir að hafa flett síðustu síðunni af eitt þúsund situr maður skekinn eftir: Er lífið svona miskunnarlaust? Vissulega fyrir manninn en ekki náttúruna. Hún er villt, fögur og saklaus. Meistaraverk sem einnig hefur hlotið alþjóðlega viðurkenningu.“

Auk Ragnars og Yrsu hafa höfundar á borð við Ian Rankin, Peter Høeg, Jo Nesbö, John le Carré, Philip Kerr og Minnette Walters hlotið Palle Rosenkrantz -verðlaunin.