Þung­bært skref að boða verk­bann

Í morgun var greint frá því að SA hefðu boðað atkvæðagreiðslu um boðun verkbanns á félagsfólk Eflingar sem starfar eftir samningi samtakanna og stéttarfélagsins. Verði verkbannið samþykkt nær það til um það bil tuttugu þúsund starfsmanna og hefst á þriðjudaginn í næstu viku. 

Halldór Benjamín Þorbergsson, framkvæmdastjóri Samtaka atvinnulífsins, var gestur í Bítinu á Bylgjunni í morgun og ræddi þá stöðu sem upp er komin í kjaradeilunni. Hann segir kröfur Eflingar vera langt frá því sem hægt er að sætta sig við. 

„Þessa daga sem við sátum hjá ríkissáttasemjara fórum við mjög langt og mættum til leiks til að gera kjarasamning við Eflingu. Ég trúði því að við myndum ná saman vegna þess að við tókum samningsrammann við SGS-félögin og teygðum hann og toguðum til að koma til móts við öðruvísi samsetningu Eflingarfélaga miðað við SGS-félögin,“ segir Halldór Benjamín en ekki tókst að fá Eflingarfólk til að samþykkja þessar teygðu tillögur sem hann kallar Eflingaraðlögun fyrir Eflingarfólk. 

Hann segir að SA hafi mögulega teygt sig of langt en nú sé horft upp á það að samfélagið verði komið í algjöran hnút öðrum hvorum megin við næstu helgi. 

„Við stigum það skref en Eflingarsamningur fyrir Eflingarfólk var ekki nóg heldur vildu þau meira og það munaði mjög miklu. Það munaði það miklu að settur ríkissáttasemjari, að meira að segja hann þegar hann horfði yfir samningsborðið, að hann sá ekki tilefni til þess að leggja fram miðlunartillögu. Það væri of langt á milli aðila. Það segir allt sem segja þarf um afstöðu Eflingar og samningsvilja þeirra,“ segir Halldór. 

Hann segir að þegar SA voru tilbúin að leggja niður vopnin og taka upp pennann þá hafi forysta Eflingar enn verið grá fyrir járnum. Kröfur þeirra hafi verið mun hærri en SA hefðu nokkurn tímann gengið að. 

Viðvera hans ekki vandamálið

Það tókst að semja um hlé á verkfallsaðgerðum Eflingar á meðan Halldór Benjamín var heima með streptókokka. Hann sneri aftur um helgina og þá sigldu viðræðurnar í strand. Aðspurður segist hann ekki telja að viðvera hans hafi eitthvað með það að gera. 

„Ég gef ekkert fyrir söguskýringar riddara Facebook. Öfugt við Eflingu eru Samtök atvinnulífsins dreifstýrð samtök, það er enginn einn sem stýrir stefnu SA eða hvernig við högum okkur,“ segir Halldór. 

Hann segir Sólveigu Önnu vera allt aðra manneskju þegar hún birtist í fjölmiðlum og þegar hún situr við samningsborðið. Til að mynda tali hún oft um mikinn samningsvilja Eflingar en að mati Halldórs er sá vilji ekki til staðar. 

„Mynstur sem er að teiknast upp á íslenskum vinnumarkaði er þetta, Efling hefur undir núverandi forystu gert fimm stóra kjarasamninga og alltaf farið í verkfall. Það er tími til þess að brjóta það upp,“ segir Halldór Benjamín. „Það væri óábyrgt af SA að segja að við ætluðum að fallast á auknar kröfur Eflingar sem myndi leiða til þess að við þyrftum að taka upp alla kjarasamninga landsins með einum eða öðrum hætti. Það er staða sem ekki er hægt að búa við.“

Engin laun

Í verkbanninu sem greidd verða atkvæði um í dag og á morgun munu starfsmenn Eflingar sem starfa eftir kjarasamningi stéttarfélagsins og SA ekki mæta í vinnuna, fá ekki laun, engar orlofsgreiðslur og engar lífeyrisgreiðslur. Þá þurfa þeir að sækja bætur í verkfallssjóð Eflingar. 

„Það er önnur heimild sem samkvæmt lögum er að þegar að verkföll hafa lamað starfsemi fyrirtækja þá er atvinnurekenda, sem neyðarréttur, gert kleift að fella fólk af launaskrá. En þá fer fólk beint á atvinnuleysisbætur. Ég segi að samfélagið hafi borið nægan fjárhagslegan skaða af framgöngu Eflingar að við förum ekki líka að bæta þeim á atvinnuleysisskrá,“ segir Halldór. 

Kveið fyrir viðtali í fyrsta sinn í sjö ár

Honum þykir það ömurlegt að vera kominn á þennan stað í deilunni og að ekkert sambærilegt dæmi sé til í nútímasögunni. Viðtalið í Bítinu í dag hafi verið það fyrsta í sjö ár sem hann kveið fyrir. 

„Við berum ríka ábyrgð, við getum ekki snúið við og látið þetta yfir okkur ganga. Við verðum að stíga í ístaðið og ná tökum á þessum aðstæðum. Forysta Eflingar er flink í því að valda samfélaginu skaða,“ segir Halldór. 

Hann kallar eftir því að stjórnmálamenn fari að fylgjast með deilunni og stinga niður fæti. Yfirvofandi eru verkföll 1.650 starfsmanna sem allir í samfélaginu munu finna fyrir. 

„Ástæða þess að við erum í þessari stöðu núna er að vinnulöggjöfin, sem er frá 1938, Efling mætir og segir að við ætlum ekkert að hlýta þessum leikreglum. Þá fer allt á hliðina og ábyrgir aðilar verða að setja niður fæti,“ segir Halldór.