Erlent

Hipkins tekur við af Ardern

Árni Sæberg skrifar
Chris Hipkins verður næsti forsætisráðherra Nýja-Sjálands
Chris Hipkins verður næsti forsætisráðherra Nýja-Sjálands EPA-EFE/BEN MCKAY

Nýsjálenski þingmaðurinn Chris Hipkins gefur einn kost á sér í formannsstöðu nýsjálenska Verkamannaflokksins og mun því að öllum líkindum taka við sem forsætisráðherra á mánudag af Jacindu Ardern, sem tilkynnti afsögn sína í gær.

Ardern kom Nýsjálendingum og öðrum að óvörum í gær þegar hún tilkynnti að hún hefði ákveðið að segja af sér sem forsætisráðherra og formaður Jafnaðarflokksins.

Hún mun láta af störfum ekki seinna en 7. febrúar og segist hreinlega ekki hafa orku til að sinna starfinu lengur.

Eftirmaður hennar í báðum stöðum verður að öllum líkindum þingmaðurinn og ráðherrann Chris Hipkins. Hann gegnir stöðu ráðherra lögreglumála, menntamála og almannaþágumála. Hann var áður ráðherra Covid-19-mála. Breska ríkisútvarpið greinir frá.

Það eina sem stendur í vegi fyrir embættistöku Hipkins er atkvæðagreiðsla þingmanna Verkamannaflokksins um formannsembættið. Hún fer fram í þinginu á mánudag.

Svo gæti þó farið að Chris verði ekki lengi í paradís en þingkosningar verða haldnar í Nýja-Sjálandi í október. 

Ardern sagði á blaðamannafundi í gær að hún efist ekki um að Verkamannaflokkurinn muni halda embætti forsætisráðherra en að henni þætti rétt að nýr leiðtogi leiddi flokkinn í gegnum erfiðar kosningar í skugga verðbólgu og aukins ójafnaðar í landinu.

Nýja-Sjáland
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið