Ólafur Hrafn Ásgeirsson er látinn

Ólafur Hrafn greindist með fjórða stigs krabbamein fyrir örfáum árum. Um var að ræða ristilskrabbamein og fór hann í kjölfarið í gegnum geisla- og lyfjameðferð. Allt benti til þes að krabbinn hefði náðst. En svo var ekki. Meinið dreifði sér í lungu og lifur áður en hann datt á síðasta ári, fékk flog og í ljós kom að meinið hafði dreift sér í heila.

Hann ákvað eftir að krabbameinið hafði dreifst víða um líkamann að prófa hugvíkkandi efni. Hann fór í athafnir bæði með suður-ameríska ofskynjunarefninu Ayahuasca og psylocibin sem finna má í svokölluðum ofskynjunarsveppum til þess að takast á við óhjákvæmileg örlög sín.

Hann sagðist í viðtali við Ísland í dag í nóvember telja hvern dag, hverja viku, því stutt væri eftir. Hann sagðist sáttur við örlög sín og sæi ekki eftir því að hafa látið vaða og prófað hugvíkkandi efni.

„Ekki fara í gildruna og halda að þetta sé af því að ég er að deyja þá er ég að grípa eitthvað. Ég var í ágætis standi áður en ég fór í þetta, ég þurfti ekkert á þessu að halda þannig lagað. En núna þegar ég er búinn að gera þetta þá veit ég að ég þurfti á þessu að halda.“