Hraðlestin opnar í húsnæði CooCoo‘s Nest á Granda

Auður Ösp Guðmundsdóttir skrifar 10. janúar 2023 13:42

Chandrika segir að lengi hafi staðið til að opna nýtt útibú Hraðlestarinnar á Granda. Vísir/Vilhelm

„Þegar ljóst var að þau höfðu gert upp hug sinn og að CooCoo's Nest yrði ei meir, þá var það besta í stöðunni að grípa þetta góða tækifæri fyrir okkar veitingahús,“ segir Chandrika Gunnarsson, annar stofnandi og eigandi veitingastaðanna Austur Indíafjelagið og Hraðlestin. Hraðlestin mun opna nýjan stað á Granda í vor, þar sem áður var veitingahúsið CooCoo‘s Nest. Um er að ræða fjórða útibú Hraðlestarinnar á höfuðborgarsvæðinu.

Líkt og Vísir greindi frá á dögunum var veitingastaðnum CooCoo's Nest lokað þann 30.desember síðastliðinn eftir að hafa framreitt mat fyrir gesti í áratug. Fram kom í frétt Vísis að eigendur CooCoo's Nest, Íris Ann Sigurðardóttir og og Lucas Keller, hefðu sett staðinn á sölu síðastliðið haust og að réttur aðili hefði fundist stuttu fyrir jól.

Voru fastakúnnar

Í samtali við Vísi segir Chandrika að lengi hafi staðið til að opna nýtt útibú Hraðlestarinnar á Granda og þegar fregnir bárust af fyrirhugaðri lokun CooCoo‘s Nest hafi verið ákveðið að stökkva á tækifærið.

„Við fjölskyldan vorum tíðir gestir hjá Írisi og Lucas á CooCoo’s Nest nánast frá fyrsta degi. Við áttum fjölmargar gæðastundir hjá þeim á Grandanum og fylgdumst með af aðdáun hvernig þau stigu fyrstu skrefin í að breyta þessum borgarhluta í það sem hann er í dag.

Á þessum árum höfum við kynnst ágætlega og reynt að styðja við hvort annað í þessum snúna geira. Fyrir einhverju síðan bar á góma að þau vildu selja. Þetta voru auðvitað skelfilegar fréttir fyrir fastakúnna eins og okkur og í fyrstu reyndum við að sannfæra þau um að halda áfram.“

Nýi staðurinn á Granda mun þjónusta dyggan viðskiptavinahóp Hraðlestarinnar í Vesturbænum og á Seltjarnarnesi.

„Öll þessi ár leituðum við að húsnæði eins og það sem CooCoo’s Nest hafði, en fundum aldrei það rétta. Þangað til núna, augljóslega. Íris og Lucas vissu að við vorum að leita að húsnæði. Þau höfðu samband við okkur skömmu fyrir jól og hlutirnir gengu hratt fyrir sig,“ segir Chandrika jafnframt.

Stefna á opnun í vor

Hún segir það aldrei hafa verið ætlunina að halda rekstri CooCoo‘s Nest áfram.

„Í okkar huga er CooCoo’s Nest óaðskiljanlegt frá stofnendum þess, Lucas og Írisi. Því datt okkur aldrei í hug að reyna halda þeirra stað gangandi áfram. Okkar þekking er fyrst og fremst á indverskum mat og þeirri þekkingu ætlum við að miðla áfram á Grandanum.

Hugmyndir okkar fyrir Grandann eru ekki enn fullmótaðar, en þær munu klárlega taka mið af nýsköpunarandanum sem þar svífur yfir. Við stefnum á að opna í vor. Við ætlum bæði að bjóða upp á okkar sígildu rétti, en líka spennandi nýjungar frá Indlandi. Við höfum nýlega bætt við teymið okkar með nýjum matreiðslumeistara frá Indlandi sem kemur til með að nýta reynslu sína meðal annars til að viðhalda brunch hefðinni sem hefur myndast á Grandanum. Segja má að þetta verði okkar tilraunaeldhús, þar sem gestir fá að taka þátt í að móta nýja rétti Hraðlestarinnar.“

Veitingastaðir Seltjarnarnes Reykjavík

Mest lesið

Fleiri fréttir