Innlent

Fylgdar­maður Idol-keppanda reyndist dæmdur kyn­ferðis­brota­maður

Jakob Bjarnar skrifar
Íslenskri konu búsettri í Danmörku krossbrá þegar hún áttaði sig á því að karlmaður sem braut á henni fyrir tæpum áratug væri áberandi í Idol-inu á Stöð 2 sem fylgdarmaður keppanda, barnabarni sínu.
Íslenskri konu búsettri í Danmörku krossbrá þegar hún áttaði sig á því að karlmaður sem braut á henni fyrir tæpum áratug væri áberandi í Idol-inu á Stöð 2 sem fylgdarmaður keppanda, barnabarni sínu. Vísir/Vilhelm

Stjórnendur Idol stjörnuleitar, sem nú er til sýninga á Stöð 2 við miklar vinsældir, þurftu að bregðast skjótt við eftir að áhorfandi setti sig í samband við Stöð 2 og benti þeim á að fylgdarmaður eins keppandans væri dæmdur kynferðisbrotamaður.

Stöðvar 2-fólk fór þegar í að klippa viðkomandi út alveg eins og kostur var áður en þátturinn í gærkvöldi fór í útsendingu. Um var að ræða síðasta þáttinn áður en beinar útsendingar hefjast næsta föstudag.

Fékk áfall þegar hún sá manninn birtast á skjánum

Vísir ræddi við konuna sem hafði orðið fyrir hinni ömurlegu reynslu að sjá manninn sem braut á henni barnungri fyrir tíu árum birtast á skjánum. Hún var þá fjórtán ára. Maðurinn var dæmdur til að greiða henni 200 þúsund krónur í miskabætur og allan málskostnað. Hann var þá strætóbílstjóri og króaði hana af á endastöð í bæjarfélagi úti á landi, lokaði strætisvagninum og las fyrir hana frumsamið ljóð með kynferðislegum undirtóni.


Fögur ert og falleg drós

með flottan rjóðan vanga.

Barminn fullan af bjartri rós

sem bærir með sér anga.

Líkaminn þinn leið um hér

ljúft í sætið hjá mér

undirgefin er nú þér

fell nú skjótt í fang á þér


Maðurinn flutti eitt erindi í viðbót en það var ekki skrifað á blað sem fannst á manninum við eftirgrennslan lögreglu síðar um kvöldið.

Stúlkunni tókst að komast frá manninum við illan leik og hún segir að þetta atvik hafi haft áhrif á alla hennar æsku það liti hennar líf enn þann dag í dag, tíu árum síðar. Hún treysti engum og alltaf þegar hún sér einhvern þann sem svipar til gerandans verði henni hugsað til þessa atviks sem fékk mjög á hana.

„Mér finnst óþolandi að hugsa til þess að maðurinn birtist sem góðlátlegur afi og fólk sé að hugsa til hans sem hjálpsams góðmennis,“ segir konan sem nú er 23 ára gömul, tveggja barna móðir í sambúð og búsett í Danmörku þar sem hún er við nám.

Hún lýsir því sem miklu áfalli þegar maðurinn birtist henni á skjánum. Hún hafi afar gaman af þáttum eins og Idolinu en hún hafi ekki treyst sér til að horfa á þættina. Hún slökkti umsvifalaust á sjónvarpinu þegar hún áttaði sig á því hver var þar á ferð.

Þórhallur þakklátur að fá ábendinguna

Konan hefur sett fram ósk þess efnis að maðurinn verði klipptur út úr þáttunum og hefur Stöð 2 orðið við því alveg eins og kostur er.

„Ég fékk póst frá konunni á miðvikudag þar sem hún vísar í þetta mál. Eftir að hafa rætt við hana og séð dóm héraðsdóms ákváðum við að bregðast strax við og taka burtu ákveðna kafli úr þættinum sem tengdust þessum einstaklingi. Við erum þakklát fyrir ábendinguna,“ segir Þórhallur Gunnarson framkvæmdastjóri fjölmiðla Sýnar.

Hann segir þann hátt hafðan á við undirbúning Idol stjörnuleitar að farið sé fram á sakavottorð frá öllum keppendum. Hins vegar hafi ekki verið gengið svo langt að krefjast sakavottorðs frá aðstandendum, og hugsanlega verði hugað að því í framtíðinni.

Karlmaðurinn var sakfelldur fyrir blygðunarsemisbrot, sem heyrir undir kynferðisbrotakafla almennra hegningarlaga. Hann var sýknaður gegn neitun hans að hafa tekið utan um stúlkuna og kysst hana.

Refsingu mannsins var frestað og féll hún niður tveimur árum frá uppkvaðningu dómsins í nóvember 2014.

Vísir er í eigu Sýnar sem jafnframt rekur Stöð 2 sem framleiðir Idol stjörnuleit og sýnir.


Tengdar fréttir



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.