Handbolti

Annáll Olís-deildar karla: Valsmenn öðrum framar

Smári Jökull Jónsson skrifar
Valsmenn unnu alla titla sem í boði voru á síðasta tímabili.
Valsmenn unnu alla titla sem í boði voru á síðasta tímabili.

Sportsíldin var sýnd á Stöð 2 Sport á gamlársdag þar sem farið var yfir allt það helsta í íþróttalífinu á árinu. Tímabilið í Olís-deild karla var gert upp en Valsmenn unnu alla titla sem í boði voru á síðasta tímabili.

Allir helstu sérfræðingar Stöð 2 Sport komu saman á gamlárskvöld í Sportsíldinni þar sem íþróttaárið var gert upp í máli og myndum. Í Olís-deild karla voru Valsmenn liðið sem skaraði fram úr og vann alla titla sem í boði voru á tímabilinu.

Valsarar hófu tímabilið með sigri á Haukum í Meistarakeppni HSÍ og hófu síðan tímabilið vel þrátt fyrir að lykilleikmenn hefðu helst úr lestinni vegna meiðsla. Bræðurnir Benedikt Gunnar og Arnór Snær Óskarssynir vöktu gríðarlega athygli og voru fremstir í flokki í Valsliðinu sem tókst að tryggja sér deildarmeistaratitilinn.

Úrslitakeppnin var æsispennandi. Einvígi Hauka og KA í 8-liða úrslitum var gríðarlega dramatískt sem og viðureign FH og Selfyssinga. Að lokum voru það þó lið Vals og ÍBV sem tryggðu sér sæti í úrslitaeinvíginu um Íslandsmeistaratitilinn.

Klippa: Annáll - Olís deild karla

Einvígi þeirra var stútfullt af dramatík. Valsmenn völtuðu yfir Eyjamenn í fyrsta leiknum sem sýndu síðan gríðarlegan karakter á heimavelli í leik tvö og komu til baka. Í þriðja leiknum hafði Valur betur eftir mikla spennu og gátu því tryggt sér Íslandsmeistaratitilinn í leik fjögur í Vestmannaeyjum. Það tókst þeim eftir mikinn baráttuleik og Íslandsmeistaratitillinn því Valsmanna.

Valur varð einnig bikarmeistari í fyrra og vann því alla titla sem í boði voru á síðasta tímabili. Það afrek tryggði þeim verðlaun sem lið ársins á hófi íþróttafréttamanna nú í lok ársins, sem og Snorra Steini Guðjónssyni tilnefningu sem þjálfari ársins.

Alla umfjöllunina í Sportsíldinni um Olís-deild karla má sjá hér fyrir ofan.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.