Laun félagsmanna VR á taxta hækka um ellefu prósent að meðaltali

Líkt og greint var frá fyrr í vikunni náðist kjarasamningur Samtaka atvinnulífsins við VR, Landssamband íslenskra verslunarmanna og samflot tækni- og iðnaðarmanna, en hann felur í sér 6,75 prósent almenna launahækkun sem afturvirk sé frá 1. nóvember síðastliðnum.

Samningur VR við SA sem skrifað var undir árið 2019 rann út þann 1. nóvember síðastliðinn. Síðasta hækkunin samkvæmt þeim samningi var 1. janúar síðastliðinn.

Í þeim samningi var í fyrsta skipti samið um viðauka sem tæki mið af stöðu hagskerfisins. Þannig fengi launafólk fasta krónutölu í launahækkun á mánaðarlaun ef ákveðinn hagvaxtarauki næðist.

Hækkun um 10.500 þann 1. maí 2022

Fyrir árið 2021 hækkaði hagvöxtur á mann um 2,53% milli ára. Þar með var félagsfólki VR tryggð hækkun á lágmarkstaxta VR á mánuði um 10.500 krónur og hækkun á almenn laun um 7.875 krónur á mánuði skv. kjarasamningi. Sú hækkun bættist við launin 1. maí.

Samanburður á launatöflum félagsmanna VR úr síðustu samningum og þeim nýju leiðir í ljós meðalhækkun upp á ellefu prósent. Mesta hækkunin er hjá þeim starfsmönnum sem hafa unnið lengur en fimm ár hjá fyrirtæki sínu. Í þeim tilfellum nemur hækkunin allt að þrettán prósentum.

Að neðan má sjá hækkunina á launatöxtum hjá VR eftir starfi og reynslu.

Lægsta hækkunin er í byrjunarlaunum hjá afgreiðslufólki og sérþjálfuðu afgreiðslufólki í verslunum. Þar nemur hækkunin um 9,7 prósentum.

Desemberuppbótin hækkar úr 98 þúsund krónur í 103 þúsund krónur. Þá hækkar orlofsuppbót úr 53 þúsund krónum í 56 þúsund krónum.

Atkvæðagreiðsla hafin

Atkvæðagreiðsla um samning VR við SA og sömuleiðis samning VR við Félag atvinnurekenda, sem skrifað var undir í framhaldinu, hófst í dag. Mikill meirihluti félagsmanna VR á aðild að fyrri samningunum en hér má finna lista yfir fyrirtæki sem tilheyra samningnum við FA.

Atkvæðagreiðslan er rafræn og stendur til hádegis þann 21. desember.

Ragnar Þór Ingólfsson, formaður VR, segist hvorki geta mælt með né á móti nýgerðum kjarasamningum en telur þó að þeir verði samþykktir af félagsmönnum. 

„Ég held að fólk sé bara það upplýst að það geti tekið ákvörðun um það sjálft en ég held að fólk trúi því að við reyndum það sem við gátum. Við augljóslega vildum fá meira í gegn en þetta var niðurstaðan.“

Verkalýðshreyfingin þurfi nú að líta inn á við og þétta raðirnar svo hægt sé að ná fram raunverulegum breytingum.

Vilhjálmur hæstánægður

Rafræn atkvæðagreiðsla stendur sömuleiðis yfir hjá félagsmönnum Starfsgreinasambandið sem sömdu fyrst félaga við Samtök atvinnulífsins í byrjun desember. Gott hljóð var í formönnum einstakra félaga innan SGS fyrir helgi og töldu allar líkur á því að samningurinn yrði samþykktur.

Vilhjálmur Birgisson, formaður SGS, hefur líst yfir mikilli ánægju með samninginn. Í morgun deildi hann á Facebook launahækkun hjá vaktstjóra á bensínstöð. Sá vinnur 168 vinnustundir og fær tæplega 61 þúsund króna hækkun.

„Þetta er launahækkun á mánuði sem ég hef aldrei áður kynnt fyrir verkafólki á hinum almenna vinnumarkaði og það í skammtímasamningi,“ segir Vilhjálmur glaður.