Innlent

María segir upp sem for­stjóri Sjúkra­trygginga

Bjarki Sigurðsson skrifar
María Heimisdóttir hefur sagt upp sem forstjóri Sjúkratrygginga Íslands.
María Heimisdóttir hefur sagt upp sem forstjóri Sjúkratrygginga Íslands. Stöð 2/Sigurjón

María Heimisdóttir hefur sagt upp sem forstjóri Sjúkratrygginga Íslands. Hún segist ekki geta borið ábyrgð á rekstri stofnunarinnar þar sem hún sé vanfjármögnuð. 

Hún segir frá þessu í bréfi til samstarfsmanna sinna. Stundin greindi fyrst frá. Uppsagnarbréfið sendi hún Willum Þór Þórssyni heilbrigðisráðherra á miðvikudaginn í síðustu viku en tilkynnti starfsmönnum Sjúkratrygginga í morgun. 

María hefur starfað sem forstjóri Sjúkratrygginga Íslands undanfarin fjögur ár. Hún tók við af Steingrími Ara Arasyni í nóvember árið 2018. Árin 2010 til 2018 stýrði hún fjármálum Landspítalans. 

Sjúkratryggingar hafa verið gagnrýnar á vanfjármögnun frá íslenska ríkinu en í haust sendi María bréf fyrir hönd Sjúkratrygginga til fjárlaganefndar Alþingis. Í bréfinu segir hún fjárlagafrumvarp Alþingis leiða til stórskerðingar á þjónustu Sjúkratrygginga við landsmenn. 

Í bréfi Maríu til starfsmanna segir hún fjárveitingar til stofnunarinnar hafa lækkað síðan árið 2018 ef reiknað er á föstu verðlagi. 

Hér fyrir neðan má sjá bréfið sem María sendi starfsmönnum Sjúkratrygginga í heild sinni. 

Kæra samstarfsfólk,

nú eru fjögur ár síðan ég kom hér til starfa. Hef notið hvers dags í samstarfi við ykkur þótt það hafi verið ýmsar brekkur á leiðinni. Okkur hefur líka tekist margt býsna vel.

Sett hefur verið langtímastefna (í fyrsta sinn frá stofnun SÍ), skipulag endurskoðað í kjölinn og bætt að mestu úr þeim alvarlegu veikleikum sem fram komu í skýrslu Ríkisendurskoðunar árið 2018 (”Sjúkratryggingar Íslands sem kaupandi heilbrigðisþjónustu”), m.a. með stofnun hagdeildar og eftirlitsdeildar. Staða upplýsingatæknimála hefur tekið stakkaskiptum: Í byrjun starfs míns lágu fyrir tvær úttektir á stöðu þessa málaflokks sem allar voru mjög neikvæðar. Í dag hefur verið byggt upp öflugt upplýsingatæknisvið, ráðist í stórfelldar umbætur á öryggismálum, vefurinn endurgerður og gagnvirk birting gagna hafin, stafræn samskipti við veitendur og notendur þjónustu byggð upp og fyrstu áfangar vöruhúss gagna teknir í notkun. Sett hefur verið stefna um upplýsingatækni og öryggismál og unnið markvisst að innleiðingu stjórnkerfis upplýsingaöryggis.Skjalaumsýsla og þjónustuferlar eru í endurskoðun samhliða gerð þjónustustefnu og endurskoðun gæðamála. Byggt hefur verið upp samstarf við lykilaðila á heibrigðissviði og helstu notendasamtök. Starfsumhverfi hefur verið bætt á fjölmarga vegu og starfsánægja hefur aldrei mælst hærri þó svo enn sé nokkuð í land, ekki síst hvað ánægju með laun varðar. Framleiðni hefur stóraukist hvort sem litið er til fjölda gerðra samninga, afgreiðslu umsókna eða þjónustu á sviði hjálpartækja.

Í þessi fjögur ár hef ég unnið að því að draga meira fé til þessarar stofnunar – annars vegar til þess að hún geti sinnt sínum verkefnum skv lögum en hins vegar til þess að hún geti boðið samkeppnishæf laun. Við viljum að sjúkratryggingar séu eftirsóttur vinnustaður vegna spennandi verkefna, góðs starfsanda og frábærs vinnuumhverfis og við viljum geta borgað laun í samræmi við það sem gerist annars staðar og í samræmi við ábyrgð og álag. Það er skemmst frá því að segja að mér hefur ekki tekist að styrkja rekstrargrunn stofnunarinnar – fastar fjárveitingar til okkar í dag eru beinlínis lægri á föstu verðlagi heldur en árið 2018 og við vitum öll hve mörg ný verkefni hafa bæst við hjá okkur á þeim árum sem liðin eru síðan þá.

Fyrir hönd stofnunarinnar ber ég ábyrgð á þessari stöðu og hlýt að axla hana. Ég hef því sagt upp starfi mínu sem forstjóri. Uppsögnin tók gildi 1.desember.

Það var mjög erfið ákvörðun – því eins og ég sagði þá hef ég sannarlega notið þess að starfa með ykkur öllum og hef gert það sem í mínu valdi stendur til að efla þessa stofnun með hjálp ykkar allra. Það hefur hins vegar ekki tekist að styrkja rekstrargrundvöll hennar til að ná ásættanlegum árangri – að við getum rækt lögboðnar skyldur okkar með sóma og boðið samkeppnishæf laun. Við þessar aðstæður treysti ég mér því miður ekki til að bera ábyrgð á okkar mikilvægu verkefnum.

Ég ætla ekki að kveðja ykkur núna – við skulum halda áfram að njóta aðventunnar, hún er svo notaleg hér hjá Sjúkratryggingum

Kær kveðja

María


Tengdar fréttir

Mikilvægt að ná samningum sem fyrst

Heilbrigðisráðherra segir mikilvægt að ná samningum við sérgreinalækna sem fyrst en sumir þeirra hafa hækkað verðskrár sínar vegna skorts á samningum við Sjúkratryggingar Íslands. Það sé vont að vita til þess að það eigi að rukka allt að tvö hundruð þúsund krónur fyrir aðgerðir sem áður kostuðu mun minna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.