Sam­herji Holding hagnaðist um tæpa átta milljarða

Þetta kemur fram í ársreikningi félagsins sem samþykktur var í gær á aðalfundi félagsins. Í fyrra var hagnaður félagsins 27,4 milljónir evra, rétt rúmar fjórar milljónir íslenskra króna. 

Eignir samstæðunnar í lok árs 2021 voru 645,2 milljónir evra, 95 milljarðir íslenskra króna og eigið fé nam 65 milljörðum króna. 

Helstu eignir Samherja Holding eru fyrirtæki á sviði veiða, vinnslu og sölu sjávarafurða í Evrópu og Norður-Ameríku. Mikill meirihluti eigna félagsins er erlendis. 

Á aðalfundinum var einnig kjörið til stjórnar félagsins en stjórn helst óbreytt. Stjórnarmenn eru Eiríkur S. Jóhannsson, Helga Steinunn Guðmundsdóttir, Kristján Vilhelmsson, Óskar Magnússon og Þorsteinn Már Baldvinsson.

„Á árinu 2021 voru fyrirtæki í samstæðu Samherja Holding ehf. enn að glíma við áskoranir vegna heimsfaraldursins sem kölluðu á tímabundnar breytingar á daglegri starfsemi, líkt og árið á undan. Þurftu menn að leggja mikið á sig vegna sóttvarnar- og ferðatakmarkana og er ástæða til nefna sérstaklega áhafnir skipa í því samhengi. Starfsfólkinu tókst hins vegar að aðlaga sig hratt og vel að þessum breytingum, eins og uppgjörið sýnir,“ er haft eftir Þorsteini Má Baldvinssyni, forstjóra Samherja, í tilkynningu.