Innlent

Stefnt á nýjan kjarasamning fyrir mánaðamót

Heimir Már Pétursson skrifar
Forysta aðila vinnumarkaðarins áttu fund með forsætisráðherra fyrir helgi um mögulegar aðgerðir stjórnvalda til að liðka fyrir skammatíma kjarasamningum.
Forysta aðila vinnumarkaðarins áttu fund með forsætisráðherra fyrir helgi um mögulegar aðgerðir stjórnvalda til að liðka fyrir skammatíma kjarasamningum. Vísir/Vilhelm

Forystumenn Starfsgreinasambandsins og Samtaka atvinnulífsins stefna að því að nýjum skammtímakjarasamningi verði lokið fyrir mánaðamót. Formaður VR, sem sleit viðræðum fyrir helgi, er ekki jafn bjartsýnn og telur tilboð Eflingar frá í morgun eðlilegt í ljósi stöðunnar.

Mikið er um fundarhöld hjá ríkissáttasemjara í dag þar sem fulltrúar Starfsgreinasambandsins, Landsambands verslunarmanna, VR og iðnaðarmanna voru mættir í morgun ásamt fulltrúum Samtaka atvinnulífsins.

Fulltrúar verkalýðsfélaganna og Samtaka atvinnulífsins settust að samningaborði með ríkissáttasemjara í morgun.Stöð 2/Sigurjón

Efling, sem hingað til hefur stefnt á samning til þriggja ára, breytti um stefnu í morgun og býður nú skammtímasamning með 56.700 króna launahækkun auk fimmtán þúsund króna framfærsluuppbótar.

Þetta er langt umfram það sem rætt hefur verið við önnur félög samkvæmt heimildum fréttastofu. Halldór Benjamín Þorbergsson framkvæmdastjóri Samtaka atvinnulífsins gefur ekki mikið fyrir þetta útspil Eflingar.

Halldór Benjamín Þorbergsson, framkvæmdastjóri Samtaka atvinnulífsins er vongóður um að hægt verði að gera nýja skammtíma kjarasamninga fyrir mánaðamót.Vísir/Arnar

Þetta er all veruleg hækkun sem verið er að fara fram á, er einhver möguleiki að ná sáttum um slíkar upphæðir?

„Mér finnst þú orða þetta ágætlega í þinni spurningu.“

Þannig að þér þykir ekki líklegt að þetta yrði niðurstaða?

„Ég myndi kjósa að fara fyrst yfir það með áttatíu manna samninganefnd Eflingar áður en ég deili því með þér,“ sagði Halldór Benjamín.

Ragnar Þór Ingólfsson formaður VR telur þetta útspil Eflingar hins vegar skiljanlegt í ljósi verðbólgunnar og verðhækkana.

Ragnar Þór Ingólfsson formaður VR telur ný fram settar kröfur Eflingar eðlilegar miðað við aðstæður. Hann telur nær ómögulegt að ganga frá nýjum kjarasamningum fyrir mánaðamót.Vísir/Vilhelm

„Ég held að þetta tali bara ágætlega inn í þann raunveruleika sem félagsfólk Eflingar er í. Og mestmegnið af venjulegu fólki sem er að taka á sig miklar verðlagshækkanir, aukinn húsnæðiskostnað og svo framvegis,“ sagði Ragnar Þór fyrir samningafund í morgun.

Vilhjálmur Birgisson formaður Starfsgreinasambandsins segir þá ábyrgð hvíla á samningafólki að semja um launahækkanir til félagsmanna eins fljótt og hægt væri.

Vilhjálmur Birgisson og Ragnar Þór Ingólfsson virðast meta samningsstöðuna með mismunandi hætti þessa dagana.Vísir/Vilhelm

„Það var markmiðið þegar við lögðum af stað í þessa vegferð að ná að klára kjarasamningana fyrir mánaðamót. Ég veit ekki hvort að það takist. Ég get ekki svarað því hér,“ segir Vilhjálmur. Aðkoma stjórnavalda að samningunum skipti líka miklu máli en þetta ætti að skýrast á næstu dögum.

Halldór Benjamín er eins og Vilhjálmur vongóður um að samningar takist fyrir mánaðamót.

„Öll okkar markmið og tillögur hafa miðað að því að ná því marki. Hins vegar tek ég líka undir það sem ég hef heyrt frá félögum mínum í verkalýðshreyfingunni; við verðum að líta til verðbólgunnar. Hún er raunveruleg ógn við heimilin og fyrirtækin í landinu. Að því leytinu til og þessu virtu fer ég ágætlega bjartsýnn inn í daginn,“ segir Halldór Benjamín.

Formaður VR er hins vegar ekki eins bjartsýnn á að samningar takist fyrir mánaðmót.

„Ég held að það sé alveg útilokað miðað við þær hugmyndir sem ég hef heyrt frá SA. Ekki nema það sé einhver meiriháttar viðhorfsbreyting sem kemur fram núna á þessum fundi eða samtali næstu klukkutíma. Þá held ég að það sé í rauninni alveg útilokað,“ segir Ragar Þór Ingólfsson.


Tengdar fréttir

Efling gerir SA til­boð um skamm­tíma­samning

Samninganefnd Eflingar - stéttarfélags hefur samþykkt að gera Samtökum atvinnulífsins tilboð um kjarasamning til rúmlega árs. Tilboðið er 56.700 króna flöt krónutöluhækkun á öll laun og 15 þúsund króna framfærsluuppbót til viðbótar. Þessar hækkanir komi til framkvæmda frá 1. nóvember 2022. Samningur gildi til 31. janúar 2024.

Ekki von­laust um samninga þrátt fyrir miklar flækjur

Ríkissáttasemjari ætlar að halda áfram að reyna að koma deiluaðilum saman á fundi á þriðjudag eftir að VR sleit viðræðum við Samtök atvinnulífsins í gærkvöldi. Formaður Starfsgreinasambandsins er þrátt fyrir allt vongóður um að samningar takist. Vaxtahækkun Seðlabankans og ummæli fjármálaráðherra um vinnumarkaðinn einfald þó ekki stöðuna.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×